Ռազմական հեղաշրջման փորձից հետո Թուրքիան զգալիորեն կշիռ է կորցնում միջազգային հարթակում, սակայն փորձում է հարթել հարաբերությունները Ռուսաստանի հետ: Այս մասին գրում է Die Presse-ը:
Նշվում է, որ վերջին օրերին Թուրքիայում ձերբակալված մարդկանց թվում են նաև երկու օդաչուները, որոնք 2015 թ. նոյեմբերին խփել են ռուսական Սու-24-ը: Անկարան նրանց մեղադրում է հեղաշրջմանը մասնակցելու համար: Թուրքական զտումների իրարանցման մեջ փաստերը շատ հազվադեպ են, շարունակում է հեղինակը: Ազատվելով ենթադրյալ հակառակորդներից՝ Թուրքիայի նախագահ Ռեջեփ Թայիփ Էրդողանը միաժամանակ հույս ունի վերջնականապես կարգավորել Ռուսաստանի հետ տարաձայնությունները:
Երկկողմ հարաբերությունները վաղուց այսքան արտառոց ձևեր չեն ստացել, ասվում է նյութում: Մի քանի ամսում Էրդողանը և նրա ռուս գործընկեր Վլադիմիր Պուտինը բարեկամներից թշնամիների վերածվեցին, իսկ հիմա, չհաջողված հեղաշրջումից հետո, նրանց միջև նորից բարեկամություն ու ներդաշնակություն է թագավորում, ճիշտ է, անհայտ է՝ երկա՞ր ժամանակով, թե՞ ոչ:
Ըստ հոդվածագրի՝ Մոսկվային ձեռնտու է իրավիճակը, որում հայտնվել է Էրդողանը: Մոտ ժամանակներս նա կզբաղվի պետության վերակառուցմամբ ավտորիտար ձևով և տնտեսական խնդիրների լուծմամբ: Նրա տարածաշրջանային ամբիցիաները երկրորդ պլան կմղվեն, և Ռուսաստանը առաջատար դիրքեր կզբաղեցնի Սիրիայում որպես միջազգային միջնորդ և ռազմական ուժ: