Լատինաամերիկյան տարածաշրջանային բլոկների ղեկավարները կարծում են, որ Բոլիվիայի նախագահ Էվո Մորալեսի օդանավի համար երկինքը փակելու՝ Ֆրանսիայի և Պորտուգալիայի գործողություններն արդարացում չունեն: Այս մասին հայտնում է RIA Novosti-ն՝ հղում անելով լատինաամերիկյան ԶԼՄ-ներին:
Հարավամերիկյան ազգերի միության (UNASUR, 12 անդամ) գլխավոր քարտուղար Ալի Ռոդրիգեսը վիրավորական և աբսուրդային է անվանել արգելքը, որի հիմքում այն է, թե օդանավում իբր կարող էր լինել Սնոուդենը:
Նրա խոսքով՝ աբսուրդն այն է, որ ԱՄՆ-ի դեմ գործելու փոխարեն՝ նրանք գործում են ինքնիշխան Բոլիվիայի դեմ:
Ամերիկյան պետությունների կազմակերպության ղեկավար Խոսե Միգել Ինսուլսան նույնպես իր անհամաձայնությունն է հայտնել եվրոպական իշխանությունների որոշման առնչությամբ: Նա բացատրություն է պահանջել եվրոպական երկրներից:
Թռիչքը տեղի է ունեցել անցած գիշեր: Մոսկվայից մեկնած օդանավը մինչ այդ որոշումը օդում է գտնվել մոտ 3.5 ժամ և ստիպված է եղել վայրէջք կատարել Վիեննայում:
Բոլիվիայի իշխանությունները հայտարարել են, որ Պորտուգալիայի ու Ֆրանսիայի գործողությունները սպառնալիքի տակ են դրել նախագահի կյանքը: Բոլիվիայի պաշտպանության նախարարը կարծում է, որ այդ ամենի հետևում կանգնած է ԱՄՆ-ը:
Ավելի ուշ Ֆրանսիան և Պորտուգալիան կրկին թույլ են տվել Մորալեսի օդանավին օգտվել իրենց օդային տարածքներից: Իսպանիայի իշխանությունները թույլտվություն են խնդրել ուսումնասիրելու օդանավը՝ մինչ թռիչքը շարունակելը: Բոլիվիայի իշխանությունները նման պայմանները շանտաժ են համարել և իսպանացիներին մերժել են:
