«Յոթի գործով» փաստաբան Երվանդ Վարոսյանը «Առաջին լրատվականի» հետ զրույցում նկատեց, որ թե՛ Ռոբերտ Քոչարյանի, թե՛ Տիգրան Թորոսյանի վերջին հարցազրույցներում նշված տվյալները չեն կարող որպես ցուցմունք ընդունվել Հատուկ քննչական մարմնի կողմից, քանզի ցուցմունքը իրավական գործընթաց է և տեղի է ունենում անձի հարցաքննության ժամանակ:
Վարոսյանը նկատեց, որ մարտիմեկյան դատավարությունների ժամանակ ակնհայտ էր, որ ընդհանրապես արտակարգ դրության վերաբերյալ հրամանն ապօրինի էր, իսկ բանակի ներգրավումը` հակասահմանադրական. «Անկախ նրանից, թե ով ում հետ է համաձայնեցրել, ով ինչ է ասել, այդ հրամանագիրն ինքնին ապօրինի էր, և այն ժամանակ հարկ չի եղել արտակարգ դրություն մտցնել»:
Հարցին, թե հնարավո՞ր է, որ վերջին հարցազրույցներից հետո Տիգրան Թորոսյանն ու Ռոբերտ Քոչարյանը կանչվեն Հատուկ քննչական ծառայություն հարցաքննության, Վարոսյանը պատասխանեց. «Մարտի 1-ի գործով օբյեկտիվ և բազմակողմանի նախաքննություն անցկացնելու պարագայում այդ անձինք դեռևս երեք տարի առաջ պիտի հարցաքննվեին»:
Վարոսյանը նաև նկատեց, որ «եթե Մարտի 1-ի գործով օբյեկտիվ քննություն կատարվի, ապա այն հարյուրավոր դատավճիռներ, որ արձակվել են ընդդիմության ներկայացուցիչների գործերով, պիտի բեկանվեն»: