Փաստաբան Աննա Ստավիցկայան, ով ներկայացնում է Ռուսաստանի Դաշնային խորհրդի նախկին սենատոր Լևոն Չախմախչյանի շահերը, հաստատել է, որ վերջինս ազատ է արձակվել գաղութից, որտեղ նա պատիժ էր կրում գործած հանցանքի համար: Այս մասին հաղորդում է RIA-Novosti գործակալությունը: Ընդ որում` նա ազատվել է այս տարվա հունվարին, սակայն այդ մասին հայտնի է դարձել միայն երեկ, ինչի մասին «Առաջին լրատվականը» տեղեկացրել էր:
Ստավիցկայան նշել է, որ Չախմախչյանը գտնվում էր Օմսկի մարզի գաղութներից մեկում և ազատ է արձակվել օրինակելի պահվածքի համար, չնայած դատախազության կողմից ներկայացված բողոքներին: Փաստաբանը նշել է, որ օրինակելի պահվածք ասելով` նկատի է առնվել այն, որ «Չախմախչյանը զբաղվել է ակտիվ հասարակական գործունեությամբ, ինչպես նաև թողարկել է գաղութի թերթ»:
Հիշեցնենք, որ Չախմախչյանը ձերբակալվել էր 2006թ. ամռանը` իր փեսայի հետ խարդախություններ գործելու և գործակցից մի քանի միլիոն ռուբլու կաշառք պահանջելու համար: Չախմախչյանն իր մեղքը չի ընդունել: