Ռուսաստանի ռազմավարական նպատակը Հարավային Կովկասում նախկին ռուսական կայսրության սահմանների վերականգնումն է այնքանով, որքանով կստացվի: «Առաջին լրատվական»-ի հետ զրույցում նման կարծիք հայտնեց ուկրաինացի հեղինակավոր վերլուծաբան Վիտալի Պորտնիկովը՝ խոսելով Ղարաբաղյան հակամարտության շուրջ վերջին զարգացումների մասին:
Սառեցված հակամարտությունները, Պորտնիկովի կարծիքով, հենց դրա համար էլ կոչվում են սառեցված, որովհետև կարող են ցանկացած պահի բռնկվել, քանի որ կողմերից ոչ մեկը չի կարող լիովին գոհ լինել իրավիճակից և ձգտում է ամրապնդել իր ուժային կամ բանակցային դիրքերը: Եվ այս իմաստով Ղարաբաղյան հակամարտությունը մնում է այնպիսին, ինչպիսին եղել է:
Գնահատելով Ռուսաստանի դերակատարությունը այս հիմնախնդրի կարգավորման գործընթացում՝ Պորտնիկովն ասում է, որ Մոսկվայի մարտավարական նպատակը ստատուս-քվոյի պահպանումն է, քանի որ հենց սառեցված հակամարտությունն է թույլ տալիս «ծուղակի մեջ» պահել Հայաստանը և Ադրբեջանը, մասամբ նույնիսկ Վրաստանը՝ պահպանելով Ռուսաստանի գերիշխող ազդեցությունը տարածաշրջանում:
«Ռուսաստանի ռազմավարական նպատակը վերադարձն է նախկին կայսրության սահմաններին այնքանով, որքանով դա հնարավոր կլինի»,- նշեց Պորտնիկովը:
Վերլուծաբանը անդրադարձավ նաև Վարշավայում կայանալիք ՆԱՏՕ-ի գագաթնաժողովին՝ ասելով, որ գագաթնաժողովն առաջին հերթին որոշելու է Ռուսաստանի նկատմամբ վերաբերմունքը և արձագանքը Եվրոպայի արևելքում:
«Դժվար թե Հարավային Կովկասի երկրները լինեն ուշադրության կենտրոնում, բայց ՆԱՏՕ-ի և Ռուսաստանի հարաբերությունների հետագա պատկերը չի կարող չազդել այդ տարածաշրջանում իրավիճակի վրա»,- նշեց մեր զրուցակիցը:
