Այսօր ՆԱՏՕ-ի գլխավոր քարտուղար Անդերս ֆոգ Ռասմուսսենը համոզմունք է հայտնել, որ Դաշինքի ընդլայնումը դեպի արևելք, անշուշտ, մեծ օգուտ է բերել Ռուսաստանին: Այս մասին նա ասել է` ելույթ ունենալով Վաշինգտոնի Հոփքինսի համալսարանում:
Նա հայտարարել է, որ ՆԱՏՕ-ի բաց դռների քաղաքականությունն ամենևին էլ ուղղված չէ Ռուսաստանի դեմ, թեպետ այդ երկրում կան որոշ քաղաքական գործիչներ, որ այդպես են կարծում: «Ընդհակառակը` այն փաստը, որ մենք ՆԱՏՕ ենք ընդունել Արևելյան և Կենտրոնական Եվրոպայի երկրներին, օգնել է Ռուսաստանին ամրապնդելու կայունությունն իր արևմտյան սահմաններին, ինչին Ռուսաստանը չէր կարողանում հասնել մի քանի դար շարունակ»,- ավելացրել է նա:
Անդերս ֆոգ Ռասմուսսենն ասել է, որ ՆԱՏՕ-ի և Ռուսաստանի միջև հարաբերություններում ամենամեծ խնդիրը Վրաստանն է: «Մենք աջակցում ենք այդ երկրի ինքնիշխանությանն ու տարածքային ամբողջականությանը, ինչպես նաև Աբխազիայի և Հարավային Օսիայի չճանաչմանը: Մենք կոչ ենք անում Ռուսաստանին մինչև վերջ կատարել միջազգային պարտավորությունները», ասել է ՆԱՏՕ-ի գլխավոր քարտուղարը` հավելելով, որ Մոսկվան և Բրյուսելը «ինտենսիվ երկխոսում են այս հարցով», տեղեկացնում է RBC-ն: