Կառավարության նիստերի դահլիճում այսօր հավաքվել էին ԺԿ առաջնորդ Տիգրան Կարապետյանի նախաձեռնած հայրենասիրական ուժերի և անհատ քաղաքացիների համաժողովի ներկայացուցիչները:
Ինչպես նշեցին համաժողովի կազմակերպիչները, այս շարժումը նպատակ ունի համախմբել բոլոր այն ուժերին, ովքեր երկրում փոփոխություններ են ցանկանում իրականացնել:
ԱԺ պատգամավոր Վարդան Խաչատրյանը համաժողովի ընթացքում նշեց, որ այսօր մենք ապրում ենք խառնակ ժամանակաշրջանում, երբ երկրի քաղաքական էլիտան կորցրել է հասարակության վստահությունը, ինչպես նաև վստահությունը սեփական շարքերի մեջ:
Խաչատրյանը նկատեց, որ Հայաստանի առջև այսօր ծառացած մի քանի հիմնական խնդիրներ կան` ընտրությունների անարդարացիությունը, իշխանության և կապիտալի սերտաճումը, բարոյական արժեքների կորուստը:
Համաժողովին ներկա էր նաև «Ղարաբաղ» կոմիտեի անդամ Աշոտ Մանուչարյանը, ով նշեց, թե 20 տարի է, ինչ ամբողջ ազգով դեգերում ենք անապատում. «20 տարի է` անկախ Հայաստանի փնտրտուքի մեջ ենք: Այսօր ո´չ նախարարները, ո´չ նախագահները, ո´չ օլիգարխները չունեն ելքի դեղատոմս: Մենք մոռացել ենք մեր աստվածներին` ոսկե հորթին ենք պաշտում: Հարստությունը կերել է մարդկանց»:
Մանուչարյանի գնահատմամբ, ստեղծված իրավիճակից միակ ելքը իշխանությունը ժողովրդի ձեռքը տալն է. «Մենք արդեն մի անգամ արել ենք դա, իսկ հետո մոռացել: Ժողովուրդը պետք է այնպես կանգնած լինի, որ իշխանավորը, օլիգարխը ժողովրդին հաշվետու լինի: Ժողովուրդն ինքը պետք է որոշի, որ վիճակը սարդարապատային է, պետք է հավաքվի: Այդ ժամանակ կունենանք այն Հայաստանը, որը երազում ենք»:
ԺԿ առաջնորդ Տիգրան Կարապետյանն էլ իր ելույթում նշեց, որ այսօր կայանում է հայրենասիրական ուժերի միավորում, և դուռը բաց է բոլորի համար. «Որ հետո չասեն` Տիգրան Կարապետյանը մենակ է»:
Համաժողովի մասնակիցները ձևավորեցին 9 հոգուց բաղկացած համակարգող խորհուրդ, որը զբաղվելու է համաժողովի գործունեությամբ: Վարդան Խաչատրյանը ներկաներին տեղեկացրեց, որ հաջորդ հավաքի ժամանակ իրենք որոշելու են առաջիկայում կատարվելիք քայլերը:
Նկատենք, որ համաժողովին ներկա էին մի քանի տասնյակ մասնակիցներ, ինչպես նաև ՌԱԿ կուսակցության ներկայացուցիչը, որին Կարապետյանը հատուկ ողջունեց:
