Թուրքիան պատրաստվում է գնալ քայլերի, որոնք կարող են փոխել Սիրիայում քաղաքացիական պատերազմի ընթացքը: Այս մասին գրում է Financial Times թերթը:
Ամբողջ հակամարտության ընթացքում Անկարան աջակցել է սիրիացի ապստամբներին, որոնք պայքարում են կառավարական բանակի դեմ, սակայն ներքին խնդիրները Թուրքիային դրդում են փոխզիջումներ փնտրել սիրիական ճգնաժամի մյուս խաղացողների, օրինակ՝ Բաշար Ասադին աջակցող Ռուսաստանի հետ, նշում է պարբերականը:
Թուրքիան մտադիր է նեղացնել թիրախների սպեկտրը Սիրիայում՝ Անկարան առաջին հերթին կպայքարի քրդերի դեմ և կփորձի թուլացնել ԴԱԻՇ-ին, կարծում է Ատլանտյան խորհրդի վերլուծաբան Աարոն Սթեյնը:
Այդ երկու նպատակների իրագործման համար Անկարային կպահանջվի Մոսկվայի աջակցությունը, ուստի թուրքական կողմը պատրաստ է հրաժարվել Սիրիայում քաղաքական ռեժիմը փոխելու իր պահանջներից: Այս մասին, ըստ փորձագետի, վկայում է «ափսոսանքի նամակը», որը Թուրքիայի նախագահն ուղարկել է ՌԴ ղեկավարին՝ ներողություն խնդրելով Սու-24 ինքնաթիռը խփելու համար. Անկարան հասկացնում է, որ ինքը կարող է մեղմացնել իր դիրքորոշումը Սիրիայում:
Financial Times-ի դիվանագիտական աղբյուրները հայտնում են, որ Անկարան արդեն քրդական հարցը քննարկում է սիրիական ռեժիմի հետ կապի փակ ալիքով՝ Ալժիրի միջոցով: Բացի դրանից, թերթի տեղեկությամբ՝ մեկ շաբաթ առաջ թուրքական կողմը կազմակերպել է հանդիպում, որին հրավիրված են եղել սիրիական ընդդիմության և Մոսկվայի ներկայացուցիչներ:
«Քրդերին և ապստամբներին վերաբերող փոխզիջումներ և զիջումներ կլինեն: Բայց թուրքերն ամբողջովին չեն հրաժարվի ընդդիմությունից, դա նրանց շահերից չի բխում»,- պարբերականին ասել է «Ֆաստակիմ Կամա Ումիրթ» ապստամբ խմբի առաջնորդ Եզզեդին ալ-Սալամեհը: