Ալիեւ-Սարգսյան ֆրանսիական հանդիպման նախապատրաստությունն ընթանում է արագացված տեմպերով։ Կարծես էստաֆետը Փարիզին հանձնելով՝ ՌԴ նախագահ Վլադիմիր Պուտինը Ֆրանսիայի նախագահ Ֆրանսուա Օլանդին իրազեկել է Ղարաբաղյան կարգավորման թեմայով Հայաստանի և Ադրբեջանի նախագահների հետ եռակողմ հանդիպման արդյունքների մասին։ «Վլադիմիր Պուտինը տեղեկացրել է Ֆրանսուա Օլանդին՝ որպես ԼՂ կարգավորման ԵԱՀԿ Մինսկի խմբի համանախագահող երկրի ղեկավարի, հունիսի 20-ին Սանկտ Պետերբուրգում Հայաստանի և Ադրբեջանի նախագահներ Սերժ Սարգսյանի և Իլհամ Ալիևի մասնակցությամբ եռակողմ հանդիպման արդյունքների մասին»,- ասվում է Կրեմլի հաղորդագրությունում։
ԵԱՀԿ Մինսկի խմբի ամերիկացի համանախագահ Ջեյմս Ուորլիքն է մեկնաբանել Ֆրանսիայում Հայաստանի ու Ադրբեջանի նախագահների հանդիպման հավանականությունը:
Ուորլիքն ասել է, որ ԵԱՀԿ Մինսկի խմբում համանախագահող երկրները` ԱՄՆ-ը, Ֆրանսիան, Ռուսաստանը, մտադիր են մոտ ժամանակներս կազմակերպել Հայաստանի ու Ադրբեջանի նախագահների նոր հանդիպում: Ուորլիքի խոսքերով` Հայաստանի ու Ադրբեջանի նախագահների հերթական հանդիպման ժամկետը դեռ հայտնի չէ:
ԱՄՆ պետքարտուղար Ջոն Քերին առանձին հեռախոսազրույցներում Հայաստանի և Ադրբեջանի նախագահներ Սերժ Սարգսյանին և Իլհամ Ալիևին կոչ է արել խուսափել լարվածությունից Լեռնային Ղարաբաղում, որտեղ վերջին շաբաթներին հրադադարը հիմնականում պահպանվում է՝ հայտնում է Պետդեպը։
«Նա (Քերին) դրականորեն նշել է, որ հրադադարը ԼՂ շփման գծում էականորեն պահպանվում է վերջին շաբաթներին, և նախագահներին կոչ է արել խուսափել լարվածությունից՝ խաղաղ գործընթացի խթանման համար»,- ասվում է գերատեսչության հաղորդագրությունում։
Պետքարտուղարը նաև հաստատել է հակամարտության «համապարփակ կարգավորմանը» նպաստելու ԱՄՆ պատրաստակամությունը՝ առաջնորդներին կոչ անելով շարունակել երկխոսությունը ԵԱՀԿ Մինսկի խմբի հովանու ներքո։
Ադրբեջանի ԱԳ նախարար Էլմար Մամեդյարովը ասել է, որ Բաքուն պատրաստ է դիտարկելու Հայաստանի և Ադրբեջանի ղեկավարների հանդիպման ցանկացած առաջարկություն, եթե դա լինի կառուցողական: Ավելի վաղ նա հայտարարել էր, որ Հայաստանի և Ադրբեջանի ղեկավարները կարող են հանդիպել Փարիզում:
«Մեծ է այն բանի հավանականությունը, որ Ղարաբաղյան կարգավորման հաջորդ հանդիպումը կլինի նախագահների մակարդակով: Նախաձեռնությունը դուրս է գալիս Ֆրանսիայից՝ ԵԱՀԿ Մինսկի խմբի համանախագահի կողմից: Ադրբեջանը պատրաստ է դիտարկելու Ադրբեջանի և Հայաստանի նախագահների հանդիպման ցանկացած առաջարկություն, եթե դրանք լինեն կառուցողական: Մեզ համար կարևորը արդյունքն է»,- ասել է Մամեդյարովը:
«Մենք ցանկանում ենք Ղարաբաղյան հակամարտության խաղաղ կարգավորում, սակայն չպետք է լինեն բանակցություններ բանակցությունների համար: Կա ֆրանսիական կողմի առաջարկը, մենք դեմ չենք դրան»,- ասել է Մամեդյարովը:
Մամեդյարովը հայտարարել է, որ կա փաստաթուղթ, որոնց շուրջ տարվում է աշխատանք. «Եթե մենք աշխատենք այդ ուղղությամբ, ապա կկարողանանք հասնել խաղաղության: Մեր հարևան Ռուսաստանը ԵԱՀԿ Մինսկի խմբի համանախագահող երկիր է: Նա մեզ մոտ երկիր է: Հարավային Կովկասում կայունությունը կարևոր է Ռուսաստանի համար: Մենք զենք ենք գնում թե՛ Ռուսաստանից, թե՛ մյուս երկրներից»:
Լեռնային Ղարաբաղի հակամարտության գոտում իրադրության ապրիլյան սրման հարցը ներառված է նաև այսօր Թբիլիսիում մեկնարկող ԵԱՀԿ Խորհրդարանական վեհաժողովի Նստաշրջանի օրակարգում։ Գերմանիայի արտգործնախարար Ֆրանկ Վալտեր Շտայնմայերը իր տարածաշրջանային այցը եզրափակելու է այստեղ։ Թբիլիսիում նա հայտարարել է, որ Գերմանիան՝ որպես ԵԱՀԿ-ում նախագահող երկիր, ձգտում է հասնել Ղարաբաղյան հակամարտության կարգավորմանը:
«Անհրաժեշտ է քայլեր ձեռնարկել տվյալ հակամարտության լայնամասշտաբ կարգավորան և այդ տարածաշրջանւմ խաղաղության պահպանման ու ամրապնդման ուղղությամբ»,- ասել է նա:
