Վերջին շրջանում Լեռնային Ղարաբաղի և Ադրբեջանի շփման գոտու տարբեր հատվածներում շարունակվում է պարբերաբար խախտվել հրադադարի պահպանման ռեժիմը, երկու կողմերից զոհեր են արձանագրվում։
«Առաջին լրատվականը» Հայ ազգային կոնգրեսի ներկայացուցիչ Դավիթ Շահնազարյանին հարց ուղղեց, թե հայկական կողմը ի՞նչ քայլեր պետք է ձեռնարկի ստեղծված լարված իրավիճակը հաղթահարելու նպատակով:
«Ադրբեջանն այսօր իր քաղաքականությունը կառուցում է պատերազմը վերսկսելու հնարավորությունն իրական դարձնելու ուղղությամբ: Հայաստանի քայլերը համարժեք չեն։ Այս իրավիճակում Հայաստանն ուղղակի պարտավոր է բազմաթիվ և բազմաբնույթ քայլեր իրականացնել, որոնցից ամենակարևորը, կարծում եմ, պետք լինի այն, որ Հայաստանի իշխանություններն իրենց ողջ ուժերը լարեն, ԱՄՆ լոբբիստական հայկական կազմակերպություններին մոբիլիզացնեն, որպեսզի դարձյալ կյանքի կոչվի 1992թ. ընդունված ԱՄՆ Սենատի`«Ազատության աջակցության ակտի» թիվ 907 բանաձևը, որով ԱՄՆ-ին արգելվում է տնտեսական օգնություն ցուցաբերել Ադրբեջանին, քանի դեռ ԱՄՆ-ի նախագահը մասնավորապես չի զեկուցել ԱՄՆ Կոնգրեսին, որ Ադրբեջանը հրաժարվել է ուժի կիրառումից ԼՂ-ի և Հայաստանի նկատմամբ և պարտավորվել է ԼՂ խնդիրը լուծել խաղաղ ճանապարհով»,- նշեց Դավիթ Շահնազարյանը: