Մեծ Բրիտանիայի վարչապետ Դևիդ Քեմերոնը Բրյուսել է ժամանել՝ քննարկելու ԵՄ-ից դուրս գալը, բայց կուլուարներում ոմանք ասում են, որ հարաբերությունները դեռ հնարավոր է փրկել: Այս մասին գրում է Financial Times-ը:
«Վերջին հաշվով, Brexit չի լինի»,- ասել է բրիտանացի անանուն բարձրաստիճան դիվանագետը:
Բրիտանացի քաղաքական գործիչները, անհանգստացած անցած հանրաքվեի տնտեսական հետևանքներով, պնդում են, որ ԵՄ կազմից Բրիտանիայի դուրս գալու որոշ կողմնակիցներ կարող են վերանայել իրենց հայացքները: Միաժամանակ, հրապարակային հայտարարություններում և՛ Քեմերոնը, և՛ եվրոպացի ղեկավարները վստահեցնում են, որ պետք է հարգել հանրաքվեի արդյունքները:
FT-ն քննարկում է՝ արդյոք Բրիտանիան հնարավորություն ունի «անդունդից հեռու քաշվելու», եթե ժողովուրդը փոխի իր կարծիքը Brexit-ի վերաբերյալ, և արդյոք նրան կօգնեն եվրոպացի ղեկավարները: Երկու հնարավոր սցենար կա:
Առաջինի համաձայն՝ բրիտանացիները կկարողանան իրենց վերաբերմունքն արտահայտել ԵՄ-ին անդամակցությանը, եթե երկրում տեղի ունենան արտահերթ խորհրդարանական ընտրություններ: Հնարավոր է՝ դրանցում Brexit-ի հակառակորդները խոստանան չեղարկել այն կամ երկրորդ հանրաքվե անցկացնել:
Երկրորդ սցենարը ենթադրում է, որ ընտրությունները, ինչպես և ծրագրվում է, կանցկացվեն 2020թ., բայց դեռ նախքան դրանք Բրիտանիան կավարտի Brexit-ի շուրջ բանակցությունները, իսկ վարչապետը վերջնական պայմանավորվածությունը կհանձնի ժողովրդի դատին:
Սակայն, գրում է FT-ն, ցանկացած բրիտանացի քաղաքական գործչի, որը հույս ունի չեղարկել հանրաքվեի որոշումը, հիմա կպահանջվի եվրոպացի մյուս ղեկավարների օգնությունը: Ընտրազանգվածի վրա ազդելու համար պետք է խոստանալ ԵՄ բարեփոխումների նոր փաթեթ, այդ թվում՝ միջոցառումներ ներգաղթի հարցում:
ԵՄ որոշ ղեկավարներ ուրախ կլինեին, եթե Բրիտանիան մնար բլոկի կազմում, բայց մեծ մասը չի ցանկանա զիջումների գնալ, համոզված է թերթը: Դրա պատճառը վախն է, որ ԵՄ-ն, տրվելով շանտաժի, մյուս երկրներին կխրախուսի օրինակ վերցնել Բրիտանիայից:
«Սա գոյատևման հարց է մեզ համար: Մենք չենք կարող թույլ տալ, որ այդ տակտիկան հաջողությամբ պսակվի»,- հայտարարել է եվրոգոտու ղեկավարներից մեկի անանուն ավագ խորհրդատուն:
