Այսօր տեղի ունեցավ «Ղարաբաղյան հիմնախնդիրը և դրա ազդեցությունը ժողովրդավարացման ու ներքաղաքական զարգացումների վրա» փորձագիտական կլոր սեղանը: ՄԱՀՀԻ փորձագետները, հրավիրված քաղաքագետներն ու վերլուծաբանները հանդես եկան խնդրո առնչությամբ կարճ զեկույցներով ու ելույթներով:
«Անալիտիկոն» հանդեսի գլխավոր խմբագիր Գեղամ Բաղդասարյանն իր ելույթում նշեց. «Հայաստանի բոլոր նախագահները միանշանակ, պարզ խոսել են տարածքների վերադարձի մասին: Եվ միշտ էլ ասվել է, որ այլընտրանքը պատերազմն է: Բնականաբար այս մասին տեղյակ են թե՛ միջազգային միջնորդները, թե՛ ադրբեջանական կողմը… բայց ստացանք պատերազմ: Հայաստանի իշխանությունը, որը բանակցային հիմնական կողմն է, պատեհ-անպատեհ հայտարարել է, որ տարածքների խնդիր չկա, մենք պատրաստ ենք տարածքները վերադարձնել: Եվ միշտ էլ՝ թե՛ բացահայտ, թե՛ ենթատեքստով ասվել է, որ այլընտրանքը պատերազմն է: Եվ հիմա՝ ողբերգազավեշտը՝ ստացանք պատերազմը՝ առավոտից երեկո, գիշեր ցերեկ հայտնելով տարածքները հանձնելու վերաբերյալ մեր պատրաստակամության մասին: Այնպես որ ես կառաջարկեի դուրս գալ վերջին 22 տարվա այս շաբլոնից, մի քիչ շատ ավելի խորությամբ փորձել լուսաբանել այս հարցը:
Եվ ամենացավալին, քանիցս խոսվել է մեր հասարակության մեջ այդ մասին, արցախյան հաղթանակը՝ հայ ժողովրդի հաղթանակը կարծես թե բեռ է դարձել: Ես միշտ զարմանում եմ, որ ցանկացած կողմ՝ հայաստանյան, ղարաբաղյան, գրեթե ցանկացած հանդիպման գնում է այս մտայնությամբ՝ ես տարածքները հանձնում եմ, պատրաստ եմ վերադարձնել: Սա բանակցության գնալու ամենահիմար ճանապարհն է»:
Մանրամասները՝ տեսանյութում:
