Turtsia.ru կայքի փոխանցմամբ, Price Waterhouse Coopers (PwC) հասարակական կազմակերպությունը կազմել է աշխարհի 26 լավագույն մեգապոլիսների ցանկը, որում Ստամբուլը հայտնվել է 23-րդ հորիզոնականում:
Ընդ որում, Ստամբուլը օդի սակավ աղտոտվածության տեսանկյունից զբաղեցրել է 3-րդ տեղը, իսկ երկնաքերների շինարարության տեսանկյունից` 4-րդ տեղը:
Ստամբուլի բացասական գործոնների թվում նշվել են համալսարանների հետազոտական գործունեության ցածր մակարդակը, բարձր գնաճը և բնակչության ոչ բավարար կենսամակարդակը:
Հետազոտական հաշվետվության մեջ նշված է, որ ամերիկյան Բրուքինգի ինստիտուտը Ստամբուլն անվանել է աշխարհի ամենադինամիկ քաղաքը` հենվելով վերջինիս տնտեսական ու բնակչության աճի տեմպերի վրա:
Աշխարհի 26 լավագույն մեգապոլիսների ցանկը գլխավորել է Նյու Յորքը, նրան հետևում են Տորոնտոն և Սան Ֆրանցիսկոն:
Հիշեցնենք, որ Թուրքիայի վարչապետ Ռեջեփ էրդողանը հայտարարել է, որ մինչև 2023 թվականը (Թուրքիայի հանրապետության հիմնադրման 100-ամյակը) երկու նոր «քաղաքներ» են կառուցվելու Ստամբուլի եվրոպական և ասիական հատվածներում: Դրանց շինարարությունը մեկնարկելու է հունիսի 12-ին կայանալիք խորհրդարանական ընտրություններից մեկ տարի անց:
Բացի այդ, նա առաջ է քաշել միևնույն ժամանակահատվածում «Ստամբուլյան ջրանցքի» կառուցման գաղափարը, որի շնորհիվ հեղուկանավերն ու խոշոր առևտրանավերն այլևս չեն անցնի Ստամբուլի միջնամասով անցնող Բոսֆորի նեղուցով, ուր ժամանակ առ ժամանակ գրանցվում են խոշոր վթարներ: