Այսօր լրագրողների հետ հանդիպման ընթացքում թուրքագետ Լևոն Հովսեփյանը, անդրադառնալով Թուրքիայի ռազմականացմանը և մայիսի 10-13-ը Ստամբուլում անցկացված IDEF 2011 սպառազինությունների միջազգային ցուցահանդեսին, նշեց.
«Թուրքիայի ռազմականացումը, սպառազինումն աննախադեպ ծավալների է հասել, և հիմա Թուրքիան սպառազինվում է այնպես, ինչպես նախկինում երբեք չի սպառազինվել: Հիմնական շեշտադրումն արվում է նորագույն տեխնոլոգիական սպառազինության վրա»:
Հրապարակված պաշտոնական տվյալների համաձայն՝ Թուրքիան տարեկան 3.5-5 միլիարդ ԱՄՆ դոլար է ծախսում նորագույն սպառազինությունների ձեռքբերման համար:
«Մի կողմից՝ մենք տեսնում ենք Թուրքիայի գերռազմականացում, մյուս կողմից՝ հռչակված «Զրո խնդիր հարևանների հետ» հայեցակարգ, քաղաքական իմիջ: Թուրքիան հայտարարում է, թե իր հարևաններից այլևս սպառնալիք չի տեսնում, ինչպես, օրինակ, մի քանի տարի առաջ, սակայն նորացված թափով ռազմականանում է այն դեպքում, երբ եվրոպական երկրներում տեղի է ունենում հակառակ գործընթացը՝ կրճատվում է սպառազինությունը, նվազեցվում է ռազմական բյուջեն»:
Հենց այստեղ է, ըստ բանախոսի, գլխավոր հակասությունը՝ Թուրքիայի հռչակած հայեցակարգը և ռազմականացման միտումներն «իրար չեն համընկնում»:
