Եգիպտոսում իրավիճակը սրվում է: Ալեքսանդրիայում նախագահ Մուհամմեդ Մուրսիի հակառակորդների և կողմնակիցների միջև բախումների հետևանքով մեկ մարդ զոհվել է, 70-ը վիրավորվել են: Տուժածների մեծամասնությունն ընդդիմադիրներ են, որոնք փորձել են գրավել «Մուսուլման եղբայրներ» խմբավորման գրասենյակը: Տուժածների մոտ հրազենային վնասվածքներ են հայտնաբերվել:
Կահիրեի արևելքում տեղի է ունենում իսլամիստների բազմահազարանոց միտինգ: Ակցիայի կազմակերպիչները խոստացել են փողոց դուրս բերել մինչև մեկ միլիոն մարդ. նրանք բոլորը նախագահի կողմնակիցներ են հանդիսանում: Քաղաքի կենտրոնական Թահրիր հրապարակ են ձգվում Մուհամմեդ Մուրսիի հակառակորդները: Նրանք սկսել են հավաքվել ընդդիմության կողմից կիրակի օրը նշանակված ակցիայից դեռ երկու օր առաջ: Փողոցներում հերթապահում են ոստիկանության և զինվորականների ուժեղացված ջոկատները:
Նախօրեին Եգիպտոսի նախագահը դիմել էր ժողովրդին, Մուրսին ընդունել էր իր սխալները և բարեփոխումներ առաջարկել: Մասնավորապես, ներքին գործերի նախարարին հանձնարարվել է ուժեղացնել պայքարն ահաբեկչության և ավազակային հարձակումների դեմ: Մուրսին կոչ է արել նաև ազգային համերաշխության հանձնաժողով ստեղծել:
Ինչպես տեղեկացնում է ИТАР-ТАСС-ը, ուրբաթ օրը, հունիսի 28-ին, ազդեցիկ շեյխերից մեկը՝ Հասան Աշ-Շաֆիան, ընդդիմությանը կոչ է արել ազգի հաշտեցման նպատակով օգտագործել ընձեռված հնարավորությունը և պատասխանել Մուրսիի առաջարկությանը: Սակայն ընդդիմադիրները մտադիր չեն հրաժարվել իրենց ծրագրերից, մասնավորապես՝ հունիսի 30-ին կայանալիք բողոքի ակցիայից:
