Google ընկերությունը հունիս ամսին մտադիր է թողարկել նոութբուքեր, որոնք կաշխատեն Chrome օպերացիոն համակարգով: Այս մասին լրագրողներին է հայտնել ինտերնետ-հսկայի ստեղծողներից մեկը` Սերգեյ Բրինը:
Google-ի նոութբուքերն արտադրվելու են Intel պրոցեսորով Samsung և Acer Inc. ընկերությունների կողմից: Նրանց օպերացիոն համակարգը թույլ է տալու օգտվել վեբ-բրաուզերից և համացանցում օգտագործվող հիմնական հավելվածներից` առանց դրանք կոշտ սկավառակի վրա պահելու անհրաժեշտության:
Google-ի կարծիքով, հավելվածների տեղադրումից և նորացումից, ֆայլերի պահեստային պահպանումից և հակավիրուսային պաշտպանությունից հրաժարվելը թույլ կտա խնայել ժամանակի և համակարգչի ռեսուրսները:
«Համակարգչից օգտվելու բարդությունները խանգարում են օգտատերերին: Chromebook-ն առաջարկում է նոր մոդել, որն այդ բեռը ձեր վրա չի դնում»,- ասել է Բրինը:
Ավելի վաղ Google-ը թողարկել է օնլայն համակարգ, որը թույլ է տալիս ազատ և երաժշտություն լսել համացանցում և պահպանել այն հիշողության մեջ: Արդեն երկու տարի է՝ ընկերությունում խոսում են նոր օպերացիոն համակարգի ստեղծման մասին, որը այլընտրանք կլինի Microsoft Windows-ին:
Միևնույն ժամանակ, Google-ը շուկա է բաց թողել Android օպերացիոն համակարգով գործող սմարթֆոներ և պլանշետային համակարգիչները:
Google-ն իր առջև խնդիր է դրել հասնել օգտատերերի՝ համացանցից առավելագույնս օգտվելուն, ինչը թույլ կտա ընկերությանը ավելի մեծ օգուտներ ստանալ գովազդից:
