Ազգային ժողովի նախկին նախագահ Տիգրան Թորոսյանը «Ազատություն» ռ/կ-ին տված հարցազրույցում հայտարարել է, թե 2008 թ. մարտի 1-ին, երբ Երևան քաղաքում արտակարգ դրություն մտցնելու հարցը նախագահ Ռոբերտ Քոչարյանը համաձայնեցնում էր իր հետ, բանակի ներգրավման մասին խոսք չի գնացել:
Հիշեցնենք սակայն, որ 2008 թ. մարտի 1-ին հրավիրած ասուլիսում, երբ Ռոբերտ Քոչարյանը հայտարարել էր Երևանում արտակարգ դրություն մտցնելու մասին, նաև ասել էր. «Մենք ստիպված ենք բանակի հնարավորությունները կիրառել կարգ ու կանոն հաստատելու համար»:
«Բնականաբար, բանակի մասին խոսք չի գնացել, և չէր կարող խոսք լինել, որովհետև արտակարգ դրությունը չի ենթադրում բանակի օգտագործում»,- «Ազատություն» ռ/կ-ին տված հարցազրույցում ասել է Տիգրան Թորոսյանը՝ հավելելով. «Բանակի ներգրավումը որևէ տեղ որևէ ժամանակ որևէ կապ չունի խորհրդարանի հետ, առավել ևս` եթե խնդիրը պատերազմին չի վերաբերում: Միայն պատերազմի դեպքում է, որ խորհրդարանը համապատասխան արձագանք պիտի անի»:
Ապա Տ. Թորոսյանը նշել է. «Ես այսօր էլ ավելի քան համոզված եմ, որ արտակարգ դրությունը մտցվել է անհրաժեշտաբար, որովհետև կարող էին ավելի շատ զոհեր լինել: Ես համոզված եմ նաև, որ արտակարգ դրություն մտցնելը հնարավորություն տվեց խուսափել նոր զոհերից: Արտակարգ դրություն մտցնելու հետ կապված այդ խորհրդակցությունը հանրապետության նախագահի հետ նախատեսված է Սահմանադրությամբ, և, իհարկե, դա արվել է», – հավելել է նա:
ԱԺ նախկին նախագահը նշեց, որ իրավական առումով խորհրդարանի բոլոր պատգամավորները կողմ էին արտակարգ դրություն մտցնելուն, քանի որ Սահմանադրությունը և ԱԺ կանոնակարգող օրենքը նախատեսում են, որ արտակարգ դրություն մտցնելու հետ կապված Ազգային ժողովի հատուկ նիստ հրավիրելու դեպքում նախագահի հրամանագրի հետ անհամաձայնություններ ունեցող պատգամավորները կարող են սեփական նախագիծը ներկայացնել:
Հիշեցնենք, որ օրերս Մարտի 1-ի իրադարձություններն ուսումնասիրող փաստահավաք խմբի ներկայացուցիչ Անդրանիկ Քոչարյանը «Առաջին լրատվական»-ին տված հարցազրույցում, անդրադառնալով Ռոբերտ Քոչարյանի` «Մեդիամաքս»-ին տված հարցազրույցին, նշել էր. «Ռ. Քոչարյանն իր հարցազրույցում ընդամենը ասել է ակնհայտ փաստ, որ ինքը խորհրդակցել է այն ժամանակվա գործող վարչապետ Ս. Սարգսյանի և ԱԺ նախագահ Տիգրան Թորոսյանի հետ`արտակարգ դրություն մտցնելու հարցի շուրջ: Կարծում եմ` ինքը ճիշտ է ասում: Այլ բան է, թե այդ հարցը քննարկելուց հետո նույն Ազգային ժողովը ինչպե՞ս չնկատեց, որ Սահմանադրության այդքան ակնհայտ խախտում է տեղի ունենում, և Տիգրան Թորոսյանը, լինելով այդ գործի պատասխանատուն, ըստ էության, մասնակից դարձավ այդ հակասահմանադրական որոշման կայացմանը»: