«Ցանկություն չունեմ և կոռեկտ չեմ համարում ցանկացած հարցազրույց մեկնաբանելը, այդ թվում՝ և Ռոբերտ Քոչարյանի հարցազրույցը»,- այսօր հայտարարեց ԱԺ ՕԵԿ խմբակցության պատգամավոր Հովհաննես Մարգարյանը:
«Առաջին լրատվական»-ի հարցին, թե ո՞վ է պատասխանատու Վերահսկիչ պալատի բացահայտած չարաշահումների համար, և ՕԵԿ-ը, որպես իշխող կոալիցիայի անդամ, գոնե իր մասով պատասխանատվություն կրո՞ւմ է, Հովհաննես Մարգարյանը պատասխանեց. «Այդ ոլորտում ով կատարել է այդ հանցանքը՝ ինքն էլ պատասխանատու է: Իրականացնողներն են պատասխանատու»:
Ապա նա հիշեցրեց ԱԺ-ում իր երեկվա ելույթը, որում նշել է, որ կատարվել են ահռելի յուրացումներ և որ մեղր վաճառողը ոչ թե մատն էլ հետն է լիզել, այլ ամբողջ տակառով է կերել: Այնուամենայնիվ, հարցը պնդեցինք՝ լինելով իշխանության մեջ, ՕԵԿ-ը քաղաքական պատասխանատվություն կրո՞ւմ է, թե՞ այդ ամենի պատասխանատուն ՀՀԿ-ն է: Ի պատասխան՝ Մարգարյանն ասաց. «Անձը պետք է պատասխանատվության ենթարկվի: Եթե դուք օրենք խախտեք, ձեր խմբագիրն ինչո՞ւ պետք է ձեր փոխարեն պատասխան տա»:
