Business Грузия-ի փոխանցմամբ, ջրային պաշարներով հարուստ Վրաստանում ջրամատակարարումը դեռևս շարունակում է խնդիր մնալ:
Ընդհանուր առմամբ, Վրաստանում առկա է 26,060 գետ, սակայն վերերկրյա ջրերի մեծ մասը և ստորերկրյա ջրերի մի մասն աղտոտված է: Ջրով ապահովված է երկրի բնակչության 65 տոկոսը:
Եթե երկրի խոշոր քաղաքների բնակիչներն ապահովված են ջրով, ապա գյուղերի մեծ մասի համար դա շարունակում է խնդիր մնալ, ինչը հատկապես վերաբերում է հեռավոր շրջանների գյուղերին: Տասնամյակներ շարունակ դա իրեն զգացնել է տվել Կախեթում ու Վրաստանի արևմտյան գյուղերում:
Վերջին շրջանում վրացական իշխանությունները ձեռնարկել են երկրի ողջ բնակչությանը ջրով ապահովելու գործընթաց: Այդ նպատակով բազմաթիվ ջրային հորատումներ են իրականացվում:
Ջրային ապահովման հարցում առանձնահատուկ ուշադրություն է հատկացվում Արևելյան Վրաստանին, որը համարվում է երկրի հիմնական գյուղատնտեսական շրջանը: Բացի այդ, եթե Արևմտյան Վրաստանում գրեթե յուրաքանչյուր ընտանեկան տնամերձում կարելի է ականատես լինել ջրհորի, ապա նույնը չի կարելի ասել Արևելյան Վրաստանի պարագայում:
Միևնույն ժամանակ ջրհորները դեռևս չեն հանդիսանում խնդրի պարփակ լուծում, քանի որ, ինչպես արդեն նշվեց, վերերկրյա ու ստորերկրյա աղբյուրների մեծ մասն աղտոտված է:
Ընդհանուր առմամբ, ջրի աղտոտվածությունը ժամանակակից աշխարհի լրջագույն խնդիրներից մեկն է: Դրա պատճառը մարդկային գործոնն է. մարդիկ շարունակ կենցաղային ու արդյունաբերական թափոնները լցնում են գետերի, լճերի ու ջրամբարների մեջ:
The Healthy World հասարակական կազմակերպության տվյալներով` Կուր գետը լրջորեն աղտոտված է, և նրանում պղնձի քանակը գերազանցում է թույլատրելի նորմերը 1000 անգամ, իսկ մոլիբդենի քանակը` 2500 անգամ:
Հիշեցնենք, որ Ադրբեջանը շարունակ մեղադրում է հարևան Վրաստանին ու Հայաստանին` Կուր և Արաքս գետերն աղտոտելու մեջ: Խնդիրը խիստ արդիական է Ադրբեջանի համար, քանի որ նրա քաղցրահամ ջրերի պաշարների 70 տոկոսը բաժին է ընկնում Հայաստանից և Վրաստանից ներհոսող հենց այդ երկու գետերին: