Վրացական Apsny.ge կայքի փոխանցմամբ, Թուրքիայի ու Վրաստանի պաշտպանության նախարարներ Մեհմեթ Վեջդի Գյոնյուլն ու Բաչո Ախալայան Ստամբուլում քննարկել են թուք-վրացական ռազմական համագործակցությանն առնչվող խնդիրներ:
Պաշտպանության նախարարների հանդիպումը կայացել է մայիսի 9-13-ը Ստամբուլում ընթացող IDEF-2011 ռազմական արդյունաբերության 10-րդ միջազգային ցուցահանդեսի շրջանակներում:
Հանդիպման ժամանակ Ախալայան թուրք գործընկերոջը շնորհակալություն է հայտնել Վրաստանի զինված ուժերի զարգացման գործում թուրքական կողմի ցուցաբերած աջակցության համար և հույս հայտնել, որ թուրք-վրացական ռազմական համագործակցությունը կշարունակվի նաև այսուհետ:
Կողմերն ընդգծել են, որ թուրք-վրացական ռազմական համագործակցությունն իր մեջ ընդգրկում է լայն շրջանակներ. ռազմական կրթություն, ռազմա-տեխնիկական համագործակցություն և այլն:
Հիշեցնենք, որ Թուրքիան մեծ դեր է խաղացել Վրաստանի զինված ուժերի կազմավորման ու արդիականացման հարցերում: Երկու երկրները ռազմական համագործակցության առաջին քայլը կատարեցին 1997 թվականի հուլիսի 14-ին, երբ կնքվեց վրաց զինծառայողների` Թուրքիայում ռազմական կրթություն ստանալու մասին պայմանագիրը, ինչի շնորհիվ արդեն 2008 թվականին 56 վրաց սպաներ ու կուրսանտներ պատրաստվեցին Թուրքիայի ռազմական հաստատություններում:
1998 թվականի դեկտեմբերին Թուրքիան Վրաստանի ռազմածովային ուժերին նվիրեց պարեկային մոտորանավակներ, ինչպես նաև տարբեր սարքավորումներ ու տեխնիկա, իսկ 2001 թվականին Թուրքիան Վրաստանի ռազմաօդային ուժերին նվիրաբերեց UH-1 տիպի երկու ուղղաթիռ` ընդ որում իր վրա վերցնելով 5 տարի շարունակ դրանց վառելիքային ու տեխնիկական ապահովումը:
Վրաստանի ցամաքային ուժերը նույնպես չեն վրիպել Թուրքիայի աչքից և ստացել են հարյուրավոր ամենագնացներ, հատուկ մեքենաներ, ավտոբուսներ («Լենդ Ռովեր», «Մերսեդես», «Ռենո») և այլն: