Թուրքական Milliyet թերթի փոխանցմամբ, «Ազգայնական շարժում» կուսակցության (ԱՇԿ) կենտրոնական գրասենյակն իր բոլոր մասնաճյուղերին «թաքնված տեսախցիկի» տագնապի ազդանշան է ուղարկել: ԱՇԿ-ի բոլոր գրասենյակներում սկսվել են լայնամասշտաբ խուզարկություններ`թաքնված տեսախցիկներ հայտնաբերելու ուղղությամբ:
Նշվում է, որ այս ամենի պատճառն այն է, որ թաքնված տեսախցիկի պատճառով ԱՇԿ վերնախավի 4 կարևոր անձինք հայտնվեցին սեռական սկանդալի մեջ, ինչը թուրքական լրատվամիջոցները որակեցին որպես «երկրաշարժ»: Այդ պատճառով էլ նրանք ստիպված եղան հրաժարական տալ և հանել հունիսի 12-ին կայանալիք խորհրդարանական ընտրություններում իրենց թեկնածությունները:
ԱՇԿ-ի խոսքերով` բացառված չէ, որ կուսակցության հեռախոսազրույցները նույնպես գաղտնալսվում են:
Հիշեցնենք, որ ինտերնետում սեռական բնույթի տեսագրությունների հայտնվելու համար ԱՇԿ նախագահ Դևլեթ Բահչելին մեղադրել է իշխող «Արդարություն ու զարգացում» կուսակցությանը և նրա նախագահ, վարչապետ էրդողանին:
Թուրքական լրատվամիջոցների փոխանցմամբ, ԱԶԿ-ի զինանոցում առկա է ևս 8 այդպիսի տեսագրություն: