Թուրքական Anadolu գործակալության փոխանցմամբ, Անկարայի 13-րդ քաղաքացիական դատարանը սկսել է «Դերսիմցի հայ Եմուշ խանումի որդի ինժեներ Քեմալը» գրքի հեղինակ Սուլեյման Եշիլյուրթի դեմ թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուի ներկայացրած դատական հայցի քննումը:
Գրքում նշվում էր, որ Թունջելիում (նախկին Դերսիմ) ծնված Քըլըչդարօղլուի մայրը հայ է, ինչը Թուրքիայում համարվում է «վիրավորանք» և միտված է հունիսի 12-ին կայանալիք խորհրդարանական ընտրություններից առաջ թուրքական ընդդիմության առաջնորդի վարկաբեկմանը:
Բացի այդ, Քըլըչդարօղլուի դատական հայցում ներառվել է նաև «Յըլդըզ» հրատարակչատան տնօրեն Աթիլա Շահինը, թուրքական խորհրդարանում արագորեն տարածված այդ գիրքը 100,000 տպաքանակով հրատարակելու համար:
Իր հայցում Քըլըչդարօղլուն պահանջում է 100,000 թուրքական լիրայի (ավելի քան 63,000 ամերիկյան դոլար) փոխհատուցում:
Հիշեցնենք, որ ապրիլի 30-ին Քըլըչդարօղլուն հայտարարել էր, որ հայ լինելն ամոթ չէ, սակայն ինքը հայ չէ` ընդգծելով, որ այսուհետ լուրջ պայքար է մղելու մամուլում այդ մասին հրապարակումների դեմ:
Ի դեպ, մարտի սկզբին թուրքական Hurriyet պարբերականի սյունակագիր Ահմեդ Հաքանն իր հոդվածում գրել էր.
«1. Մինչ օրս Թուրքիայում չի եղել մի պաշտոնյա կամ առաջնորդ, որը քաջություն կունենար և, ի պատասխան «դու հայ ես» արտահայտության, կասեր` «այո, ես հայ եմ… ասածդ ի՞նչ է»:
2. Հայ կամ հրեա լինելու մեջ մեղադրվողները համարում են, թե դա իրենց հասցեին արված վիրավորանք է և իսկույն վկայակոչում են իրենց տոհմածառն ու արմատները:
3. Հանրության մի ստվար հատված էլ, իր հերթին, խրախուսում է բոլոր նրանց, ովքեր հայկական կամ հրեական ծագում ունենալու հանգամանքը համարում են մեղսագործություն»: