Կալմիկիայից Ռուսաստանի խորհրդարանի վերին պալատում սենատոր ընտրված, այնուհետև կաշառակերության համար անազատության դատապարտված Լևոն Չախմախչյանը կրկին ազատության մեջ է: Այս մասին տեղեկացնում է «Երկրամաս» օրաթերթի կայքը:
Հիշեցնենք, որ 2008 թ. հուլիսի 17-ին նրան դատապարտել էին այն բանի համար, որ իր փեսայի և ևս մի հոգու հետ գործարարներից մեկից կաշառք էին պահանջել և ձերբակալվել հանցանքի վայրում` կաշառքը վերցնելիս: Չախմախչյանը դատապարտվել էր 9 տարվա ազատազրկման, հետագայում դատարանը նրա ազատազրկման ժամկետը կրճատել էր մինչև 7.5 տարի։
Հիշեցնենք նաև, որ այս մարդը շատ ջերմ հարաբերությունների մեջ էր (չենք կասկածում, որ հիմա էլ շարունակում է լինել) ՀՀ նախկին նախագահ Ռոբերտ Քոչարյանի հետ: Նա էր, որ 2003 թ. ժամանել էր Հայաստան` Ռուսաստանի իշխանությունների «դաբրոյի» մասին տեղեկացնելու:
Նրա գործի հետ կապված մի հետաքրքիր դրվագ էլ կա: Դատաքննության ժամանակ Չախմախչյանի կողմից ներկայացված բոլոր փաստաթղթերը, տեղեկանքները և բնութագրերը, բացի բնակության վայրից ներկայացվածից, դատախազությունը հայտարարեց գնված: Գնված միջնորդությունների մեջ մատնանշվում էր նաև ծանր հանցագործություն կատարած Չախմախչյանին ՀՀ դեսպանության կողմից տրված դրական բնութագիրը։
