Ամեն տարի աշխարհում աղբամանում է հայտնվում արտադրված ողջ սննդամթերքի մոտ մեկ երրորդը կամ 1.3 մլրդ տոննա սնունդ: Այս մասին հաղորդվում է ՄԱԿ-ի Պարենի և գյուղատնտեսական կազմակերպության (FAO) հետազոտության մեջ:
Փորձագետները պարզել են, որ զարգացած և զարգացող երկրները փչացնում են մոտավորապես նույն քանակի սնունդ` 670 և 630 մլն տոննա համապատասխանաբար: Հարուստ երկրներում ամեն տարի գրեթե նույնքան սնունդ է թափվում, որքան Սահարայից հարավ ընկած հատվածում արտադրվում է տարեկան (մոտ 230 մլն տոննա):
Եվրոպայում յուրաքանչյուր շնչին ընկնող փչացած սննդի տարեկան քանակը կազմում է 95-115 կգ: Իսկ ահա Սահարայից հարավ ընկնող տարածքներում և հարավարևելյան Ասիայում այդ ցուցանիշը կազմում է 6-11 կգ:
Զարգացող երկրներում կորուստների մոտ 40%-ը տեղի է ունենում այն տեղափոխելիս, իսկ զարգացած երկրներում մոտ 40% կորուստները տեղի են ունենում մանրածախ առևտրի համակարգում կամ օգտագործման ժամանակ:
Որպես կորուստների պատճառ են անվանվում նաև զանազան ակցիաները` «երեքը՝ երկուսի գնով», կամ ռեստորաններում ֆիքսված գներով լանչերը։ Դրանք հանգեցնում են նրան, որ սպառողները գնում են ավելին, քան իրականում կարիք ունեն:
