Հայաստանի իշխանություններին մոտ կանգնած «Առաջին լրատվական»-ի աղբյուրները հայտնում են, որ վաղը Երևան ժամանող Իրանի իսլամանական հանրապետության Արտաքին քաղաքական գերատեսչության ղեկավար Ալի Աքբար Սալեհին Հայաստանի բարձրաստիճան պաշտոնյաների հետ նախատեսված հանդիպումներից բացի ծրագրում է հանդիպել ՀՀ երկրորդ նախագահ Ռոբերտ Քոչարյանին։
Ենթադրվում է, որ կողմերի միջև քննարկվող հիմնական թեման լինելու է Հայաստանի ներքաղաքական իրավիճակը։
Ուշագրավ է, որ այս պահին ՀՀ իշխանությունները փորձում են ամեն ինչ անել Սալեհիի օրակարգից Ռ. Քոչարյանի հետ նախատեսված հանդիպումը հանելու համար։ Մինչև այս պահը դա նրանց չի հաջողվել։
Հիշեցնենք, որ պաշտոնը թողնելուց հետո Ռոբերտ Քոչարյանը 2010թ. հունվարի 21-ին հանդիպել էր Իրանի նախագահ Մահմուդ Ահմադինեժադի հետ։
Հանդիպման ընթացքում Ահմադինեժադը հայտարարել էր, որ երկու երկրները պետք է ակտիվ մասնացեն տարածաշրջանային գործընթացներին, քանի որ նրանք տարածաշրջանում կայունություն և խաղաղություն հաստատելու պոտենցիալ ունեն:
Իր հերթին Քոչարյանն ընդգծել էր, որ հայկական կողմը շահագրգռված է Իրանի հետ կապերի զարգացմամբ ու ամրապնդմամբ:
«Թեհրանն ու Երևանը երկկողմ կապերը զարգացնելու և տարածաշրջանային համագործակցության մակարդակը բարձրացնելու ներուժ ունեն»,- անցյալ տարի Իրանի նախագահի հետ հանդիպման ժամանակ ասել էր Քոչարյանը:
