Մայիսի 6-8-ին Արցախում կայացավ խճուղային հեծանվավազքի միջազգային մրցաշար` նվիրված «Սասնա ծռեր» ջոկատի հրամանատար, «Մարտական խաչ» 1-ին աստիճանի ասպետ, հեծանվորդ Սամվել Գևորգյանի հիշատակին:
Մրցաշարի բացումը տեղի ունեցավ Ստեփանակերտի Վերածննդի հրապարակում: Մրցմանը մասնակցում էին բազմաթիվ այլազգի մարզիկներ` Հանիբեկ Հանս – Ավստրիա, Բենջամին Ստաուդեր – Գերմանիա, Լանս Պրիա – Ռումինիա, Անդրեա Կալատաուդ – Ֆրանսիա, Ֆերդինանդ Գևորգյան – Էստոնիա: Մեկնարկը սկսվեց «Մենք ենք մեր սարերը» հուշարձանի մոտից, այստեղ էլ ավարտվեց: Առաջին օրը 15 կմ վազքուղին ամենակարճ ժամկետում հաղթահարեց Գերմանիայի ներկայացուցիչ Բենջամին Ստաուդերը, 2-րդը Երևանի օլիմպիական հերթափոխի մանկապատանեկան դպրոցի մարզիկ Մհեր Մկրտչյանը, Երրորդը Ֆրանսիան ներկայացնող Անդրեա Կալատաուդն էր:
Ամենադժվար և հետաքրքիր մրցապայքարը կայացավ 2-րդ օրը` մայիսի 7-ին: Մարզիկները հաղթահարեցին Ստեփանակերտ-Վանք-Ստեփանակերտ դժվարանց ու ոլորապտույտներով հարուստ ճանապարհը: Ուրախությամբ պետք է ասել, որ 100 կմ վազքուղին անցան գրեթե բոլորը, և ամենակարևորը` առանց որևէ միջադեպի: Այս անգամ առաջինը վերջնագիծը գրեթե հավասար հատեցին Ֆրանսիայի և Գերմանիայի մարզիկները: Երրորդը Ռումինիայի ներկայացուցիչ Լանս Պրիան էր: Առաջին տեղը գրաված ֆրանսիացի մարզիկ Անդրեան խոստովանեց, որ մեր երկրի բարձր դիրքը բավականին դժվարեցնում է մրցավազքը, սակայն կեռմանների հաղթահարումն իր համար հաճելի էր և հավելեց, որ իր երկրի հիմնը լսելուց հուզված էր և եթե մյուս տարի նորից նման մրցույթ կազմակերպվի, անպայման գալու է։
Երրորդ օրը մրցապայքարն ընթացավ Ստեփանակերտ-Ասկերան մայրուղու վրա` «Մենք ենք մեր սարերը» հուշարձանի մոտ: Հաղթող ճանաչվեցին Ֆրանսիայի ներկայացուցիչը` 1-ին տեղ, գերմանացի Բենջամին Ստաուդերը երկրորդն էր, իսկ երևանցի Մհեր Մկրտչյանը` երրորդը:
