Ռուսաստանի Խաբարովսկ քաղաքում ապրող Դավիթ Ստեփանյանը «Առաջին լրատվական»-ին ներկայացրել էր ՀՀ քաղաքացիական ավիացիայի նախկին պետ Հովհաննես Երիցյանի սպառնալիքների ձայնագրությունը: Այն նաև ուղարկվել էր ՀՀ ոստիկանություն, որտեղ, սակայն, Երիցյանի դեմ քրեական գործ չէր հարուցվել: Ստեփանյանը բողոքարկել էր մերժման որոշումը և Երևան քաղաքի դատախազությունը բավարարել էր նրա բողոքը՝ հարուցելով քրեական գործ ՀՀ քրեական օրենսգրքի 137-րդ հոդվածով՝ «Սպանության, առողջությանը ծանր վնաս պատճառելու կամ գույք ոչնչացնելու սպառնալիքը»:
Հիշեցնենք, որ Հովհաննես Երիցյանը Երևանից զանգահարել էր Խաբարովսկ՝ Դավիթ Ստեփանյանին, զգուշացնելով, որ «արյուն ա լինելու…»:
Ի՞նչն էր Ստեփանյանին սպառնալու առիթ հանդիսացել: Դավիթ Ստեփանյանը Հովհաննես Երիցյանի հետ ծանոթացել է դեռևս 2001 թվականին, երբ նա ղեկավարում էր ՀՀ Քաղաքացիական ավիացիան: Ստեփանյանը մեզ պատմեց, որ արտարժույթի փոխանակման կետեր է ունեցել Երևանում և բիզնեսում ներդրում անելու նպատակով պարտքով գումար է խնդրել Հովհաննես Երիցյանից: «Վերցրել եմ 150.000 ԱՄՆ դոլար՝ ամսական 2%-ով: Հետո էլի եմ վերցրել, կամաց-կամաց պարտքը դարձավ 900.000 ԱՄՆ դոլար: Ես 10 տարվա մեջ 2 միլիոն դոլարից ավելի տոկոս եմ փակել»,- վստահեցնում է Ստեփանյանը:
Այս տարիների ընթացքում Ստեփանյանը զրկվում է թե՛ ընտանեկան բիզնեսից, թե՛ իրեն և մորը պատկանող բնակարաններից: «Ես տներ գրավ դրեցի, 500.000 ԱՄՆ դոլար վճարեցի, բայց ստացական չվերցրի իրենից. մենք ընտանիքներով մտերիմ էինք: Բայց հիմա Երիցյանն ասում է, թե պիտի 900.000-ը վճարես»,- պատմում է Դավիթ Ստեփանյանը:
Նա ձայնագրել է իր և նախկին պաշտոնյայի հեռախոսազրույցը, որտեղ լսվում են Երիցյանի սպառնալիքները:
Հիշեցնենք, որ ՀՀ քաղաքացիական ավիացիայի նախկին պետ Հովհաննես Երիցյանի՝ վաշխառությամբ զբաղվելու մասին մի քանի ընտանիքներ դեռևս 2014 թվականին բաց նամակով դիմել էին ՀՀ նախագահին: Վաշխառության փաստով նախկինում հարուցվել են քրեական գործեր, սակայն Երիցյանին որևէ մեղադրանք այդպես էլ չի առաջադրվել:
Կոռուպցիայի դեմ պայքարող «Վելես» հասարակական կազմակերպության նախագահ Մարինա Պողոսյանը մեզ հետ զրույցում նշեց, որ իրենք առանձնապես ոգևորված չեն Երիցյանի դեմ վերջերս հարուցված քրեական գործով:
«Մենք հիմքեր ունենք կարծելու, որ նախկին պաշտոնյայի դեմ քրեական գործերը հարուցվում են հետագայում կաշառք ստանալու և դրանք կարճելու նպատակով: Սա արդեն երրորդ գործն է, եթե սա էլ կարճվեց, ուրեմն այլևս կասկած չի մնա, որ դատախազությունը պարզապես կաշառք է ստանում Երիցյանից»,- նշում է իրավապաշտպանը:
Մարինա Պողոսյանը հիշեցնում է, որ Երիցյան-դատախազություն մտերմությունը սկսվել է դեռևս «Նորաշեն-2007» գործից, երբ վաշխառության մեջ մեղադրվող անձանց ցուցակից հանվել է Երիցյանի անունը: «Այս մարդուն արդեն տասնյակ տարի է՝ մեղադրում են վաշխառության, խարդախության և կյանքի սպառնալիքներ հնչեցնելու համար: Իսկ որտե՞ղ է նա հիմա: Ոչ թե կալանավայրում է, այլ այն շքեղ առանձնատանը, որը նա խլել է Գայանե Թումասյանից»,- ասում է Մարինա Պողոսյանը:
Նա կոչ է անում դատախազությանը՝ չգնալ գործարքների և օբյեկտիվ քննություն անցկացնել, որի դեպքում, իրավապաշտպանը վստահ է, կբացահայտվեն բազմաթիվ հանցագործություններ: