Հուլիսի 1-ից Լեհաստանը ստանձնում է ԵՄ Խորհրդի նախագահությունը: Լրագրողների հետ հանդիպման ժամանակ Հայաստանում Լեհաստանի դեսպան Զդիսլավ Ռաչինսկին ներկայացրեց ԵՄ-ում Լեհաստանի նախագահության առաջնահերթությունները:
Դեսպանը տեղեկացրեց, որ Լեհաստանի նախագահության գլխավոր առաջնայնությունը ԵՄ նոր բյուջեի պլանավորումն է, ինչի վրա էլ իրենք աշխատում են: Երկրորդ գերակայությունը, Ռաչինսկու փոխանցմամբ, ԵՄ-ում մրցակցության ուժեղացումն ու ծառայությունների ազատականացումն է. «Էներգետիկ անվտանգության հարցերը ևս կլինեն մեր ուշադրության կենտրոնում»:
Ռաչինսկին նաև ընդգծեց, որ Լեհաստանի նախաձեռնած «Արևելյան գործընկերություն» նախագիծը ևս Լեհաստանի նախագահության առաջնահերթությունների ցուցակում է. «Պաշտոնական Վարշավան կաշխատի անել ամեն ինչ, որպեսզի «Արևելյան գործընկերության» համար նախատեսված բյուջեն չկրճատվի, ավելին` նախատեսվում է նոր միջոցներ ընդգրկել: «Արևելյան գործընկերության» նպատակներն արդեն որոշված են և այժմ կոնկրետ քայլերի ժամանակն է»:
Դեսպանը նաև տեղեկացրեց, որ այս տարի Լեհաստանի նախագահ Բրոնիսլավ Կոմորովսկին կայցելի Հայաստան, և ներկայումս հստակեցվում են այցի ժամկետները և ծրագիրը. «Այցի ընթացքում կքննարկվեն նաև Եվրոպական Միության «Արևելյան գործընկերության» ծրագրի շրջանակներում համագործակցության մասին հարցեր: Խոստանում եմ` երբ այցի ժամկետները հստակեցվեն, կհաղորդենք»:
Դեսպանի խոսքերով, այս այցը նպատակ ունի խորացնել Հայաստանի հետ սերտ համագործակցությունը: Ըստ Ռաչինսկու` այցը կարևոր է նաև Լեհաստանի` ԵՄ նախագահությունը ստանձնելու համատեքստում:
