Կարծես թե բավական հետաքրքրական է ստացվում ՀՅԴ արձագանքը Ռոբերտ Քոչարյանի վերջին հարցազրույցին: Փաստացի, ՀՅԴ ղեկավար՝ կուսակցության Բյուրոյի ներկայացուցիչ, Հրանտ Մարգարյանն «Ազատություն» ռադիոկայանին տված հարցազրույցում ասել է, որ Քոչարյանն այն մարդը չէ, ով իր վերադարձի համար որևէ մեկից թույլտվություն հարցնի: Մարգարյանը միաժամանակ կարծիք է հայտնում, որ Քոչարյանը կարող է ակտիվորեն մասնակցել 2013 թվականի նախագահի ընտրությանը:
Ըստ ամենայնի ՀՅԴ-ն փորձում է օգտվել առիթից ու թասիբի գցել Քոչարյանին: Դաշնակցությունն ամենայն հավանականությամբ հենց նրա վերադարձի մեջ է տեսնում իր փրկությունը քաղաքական դաշտում: Չէ որ 1998-ին հենց Քոչարյանը վերակենդանացրեց ՀՅԴ-ին, տեղ տվեց իշխանության մեջ: Քոչարյանի հեռանալուց հետո ՀՅԴ-ն մաս-մաս հեռանում, կամ ավելի ճիշտ հեռացվում է իշխանությունից: Դաշնակցությունն առանց Քոչարյանի առաջին իսկ ընտրությանը դուրս մնաց Երևանի Ավագանուց՝ չկարողանալով 1.5 միլիոնանոց Երևանում հավաքել 7 տոկոս ձայն:
Բնական է, որ ՀՅԴ-ի համար միակ շանսը Քոչարյանի միջոցով նորից վերակենդանանալն է, թերևս այն հույսով, որ նա իշխանության մեջ ունեցած իր ազդեցությունն ի սպաս կդնի ՀՅԴ առաջընթացին: Այսինքն, տեղի կունենա պարզ բարտեր` ՀՅԴ-ն Քոչարյանի համար կդառնա քաղաքական ֆորմա, իսկ Քոչարյանը ՀՅԴ համար կդառնա իշխանական և վարչական ռեսուրս և, իհարկե, կապիտալ: Հասարակական որևէ ռեսուրս չունեցող Դաշնակցությունն ու Ռոբերտ Քոչարյանը կարծես թե այլ ելք չունեն, քան միմյանց ապավինելը: Եվ այդ առումով՝ Քոչարյանն էլ կարող է մտածել, որ քանի դեռ Դաշնակցությունը վերջնականապես չի դարձել պատմություն, գուցե պետք է բաց չթողնել պահն ու փորձել Դաշնակցության միջոցով ինչ որ քաղաքական ծրագիր իրականացնել:
Օրինակ, ասելով, որ 2013 թվականի նախագահի ընտրությանը Քոչարյանը կարող է ակտիվ մասնակցություն ունենալ, Հրանտ Մարգարյանը թերևս նկատի ունի կամ ակնարկում է այն տարբերակը, որ Քոչարյանն ակտիվորեն սատարի ՀՅԴ թեկնածուին: Դաշնակցությունն արդեն հայտարարել է, որ նախագահի ընտրությանը գնալու է իր թեկնածուով: Թե ով կլինի նա, դեռ չեն ասել: Իհարկե, թեկնածու կարող է լինել նաև հենց Քոչարյանը, բայց դա իհարկե կլինի ոչ ուժեղ քայլ, քանի որ Քոչարյանը շանս կարող է ունենալ միայն իշխանության թեկնածու լինելու դեպքում, որպեսզի համակարգը ամբողջությամբ լծվի նրա անցկացման գործին:
Մինչդեռ ներկայումս կարծես թե այդ հավանականությունը մոտ է զրոյի: Այնպես որ, շատ ավելի հավանական է, որ Քոչարյանը 2013 թվականին ակտիվորեն աջակցի ՀՅԴ որևէ թեկնածուի: Ինչ խոսք, ՀՅԴ-ն ու Քոչարյանը թերևս այդքան միամիտ չեն լինի, որ մտածեն, թե այդպես կարող են հաղթել նախագահի ընտրությանը: Դաշնակցության հաշվարկը հավանաբար այն է, որ Քոչարյանի աջակցությամբ կարող են նախագահի ընտրությանը դառնալ որոշակի գործոն, ինչն էլ Սերժ Սարգսյանին կարող է ստիպել հաշվի նստել իրենց հետ և վերստին կիսվել իշխանությամբ: