«Ընդդիմության և իշխանության միջև ընթացող երկխոսությունը, որը չգիտես ինչու ոմանց մոտ բացասական արձագանք է ստացել, չափազանց կարևոր է մեր երկրի համար և ես այն գնահատում եմ դրական: Ընդդիմության հետ երկխոսություն սկսելու մեսիջները Սերժ Սարգսյանը ուղարկել էր դեռևս 2008 թվականի հոկտեմբերից»,- այսօր լրագրողների հետ հանդիպման ժամանակ հայտարարեց ՀՀԿ խմբակցության պատգամավոր Կարինե Աճեմյանը:
Նա նկատեց, որ ուժեղ իշխանության համար ցանկալի է ուժեղ ընդդիմություն ունենալը: Ըստ նրա՝ այս երկխոսությունը չի նշանակում «ծախվել», սա պարզապես ընդդիմության և իշխանության միջև քաղաքակիրթ շփման ձև է: Աճեմյանը նաև նկատեց, որ ճիշտ չէ կարծել, թե իշխանությունը կատարում է ընդդիմության պահանջները. «իրականում մենք կատարում ենք այն ծրագրերը`և՛ նախընտրական, և՛ հետընտրական, որոնք կան և՛ մեր կուսակցության, և՛ նախագահի ծրագրերում ու ելույթներում: Մենք իրականացնում ենք դրանք քայլ առ քայլ և եթե դա համընկնում է նաև ընդդիմության առաջադրած խնդիրներին, ապա դրանում որևէ վատ բան չկա, և եթե ուզում ենք ունենալ քաղաքակիրթ երկիր, ապա պետք է երկխոսենք և լսենք ընդդիմությանը»: