Ադրբեջանական APA լրատվական գործակալությանը տված հարցազրույցի ժամանակ Ադրբեջանում Վրաստանի դեսպան Թեյմուրազ Շարաշենիձեն անդրադարձ է կատարել երկու երկրների փոխհարաբերություններին.
«Մենք ճանաչում ենք Ադրբեջանի տարածքային ամբողջականությունը, իսկ Ադրբեջանն էլ ճանաչում է մեր տարածքային ամբողջականությունը: Վրաստանն ու Ադրբեջանը միջազգային բոլոր կառույցների շրջանակներում աջակցում են միմյանց: Ինչ վերաբերում է շրջանառության մեջ դրված այն լուրին, թե Վրաստանը պետական հեղաշրջում է նախապատրաստում Ադրբեջանում, դա այնքան անհեթեթ է, որ անգամ չարժե այն մեկնաբանել:
Վրաստանն ու Ադրբեջանը ռազմավարական գործընկերներ են: Մեր փոխհարաբերությունները գտնվում են բարձր մակարդակի վրա: Նախորդ տարի երկու երկրների միջև ապրանքաշրջանառությունը կազմել է ավելի քան 500 միլիոն դոլար, ինչը լավ ցուցանիշ է: Մենք բավական սերտ հարաբերություններ ունենք էներգետիկ, զբոսաշրջային և ենթակառույցների շինարարության ոլորտներում:
Վերջին շրջանում ավելացել են ադրբեջանական ներդրումները Վրաստանում: Ադրբեջանի պետական նավթային ընկերությունը (SOCAR) ժամանակակից տերմինալ է կառուցել Փոթիից ոչ հեռու ընկած Կուլևիում: Ադրբեջանական միջազգային բանկը մասնաճյուղ է բացել Թբիլիսիում և դրա միջոցով ֆինանսական գործողություններ է իրականացնում:
Երկու երկրների համար մեծ կարևորություն է ներկայացնում Բաքու-Թբիլիսի-Կարս (ԲԹԿ) երկաթգծի կառուցումը: Մոտավոր հաշվարկներով, այն շահագործման կհանձնվի 2012 թվականի վերջին:
Այժմ երկու երկրները սահմանագծում են իրականացնում: Կարելի է ասել, որ սահմանի 2/3-ը արդեն ճշգրտված է և մնացել է 1/3-ը»:
Հիշեցնենք, որ մասնագիտությամբ բժիշկ Թեյմուրազ Շարաշենիձեի` Ադրբեջանում Վրաստանի դեսպանի պաշտոնում թեկնածությունը վրացական խորհրդարանը հաստատել է 2010 թվականի դեկտեմբերի 10-ին: Մինչ այդ Շարաշենիձեն Թուրքիայում Վրաստանի գլխավոր հյուպատոսն էր:
