Հայաստանում Լեհաստանի դեսպան Զդիսլավ Ռաչինսկին այսօր լրագրողների հետ հանդիպման ժամանակ խոսեց նաև ԼՂ հակամարտության մասին: Նա նկատեց, որ Հայաստանի և Ադրբեջանի միջև լարվածությունն արդեն երկրորդ տասնամյակն է առկա է և շփման գծում մշտապես կրակոցներ ու զոհեր են լինում, ինչն, ըստ դեսպանի, այսօրվա ռազմատեխնիկական հնարավորությունների պայմաններում շատ հեշտ է իրականացնել՝ հաշվի առնելով, որ երկու երկրների միջև տարածությունը շատ փոքր է: Ռաչինսկին նշեց, որ այս կոնֆլիկտի լուծումը հնարավոր է միայն այն դեպքում, եթե կողմերը, միջազգային ուժերի միջնորդությամբ, հասնեն փոխզիջումային լուծման. «Պետք է կողմերը կամք դրսևորեն, որպեսզի գտնեն իրական լուծումները: Հաճախ այդ հանգուցալուծումները շատ մոտ են եղել, բայց, թերևս, ներքին խնդիրներով պայմանավորված, հակամարտող երկրների ղեկավարները չեն հանգել դրան»:
Հայաստանում Լեհաստանի դեսպանը նաև ընդգծեց, որ հակամարտությունը պետք է լուծվի ԵԱՀԿ Մինսկի խմբի շրջանակներում և այլ ֆորմատներ տանելու ձգտումը անտրամաբանական է, քանզի դա կարող է խանգարել կոնֆլիկտի լուծմանը»:
Դեսպանը նաև նկատեց, որ Հարավային Կովկասում չլուծված հակամարտությունների առկայությունը խանգարում է Եվրամիությանն այս տարածաշրջանի լիիրավ ինտեգրմանը. «Արևելյան գործընկերությունը, որում ընդգրկված են նաև Հարավային Կովկասի երկրները, նպատակ չունի լուծել այստեղ առկա կոնֆլիկտները, սակայն դրանց առկայությունը խանգարում է այս տարածաշրջանի երկրներում բազմաթիվ նպաստավոր ծրագրերի իրականացմանը: Հարավային Կովկասը կարող է ամբողջությամբ ինտեգրվել Արևելյան գործընկության ծրագրին, եթե տարածաշրջանի բոլոր երկրները հանդես գան որպես մեկ միասնական սուբյեկտ, ինչն էլ նշանակում է, որ վերջիններս միմյանց հետ պետք է ունենան քաղաքական և տնտեսական սերտ համագործակցություն»:
