Ռուսական RBK-ի փոխանցմամբ, Վրաստանի նախագահ Միխեիլ Սաակաշվիլին վրաց ձեռնարկատերերի հետ հանդիպման ժամանակ խոսել է Վրաստանի տնտեսական պլանների մասին.
«Վրաստանը դեռևս աղքատ երկիր է, սակայն հնարավորություն ունի ունենալու Եվրոպայի ամենաարագ զարգացող տնտեսությունը: Դա անելու համար վրաց գործարարներն իրենց ջանքերը պետք է բևեռեն հետևյալ երեք ուղղությունների վրա. էներգետիկ և այլ ենթակառույցներ, գյուղատնտեսական նախագծեր և զբոսաշրջություն:
Առաջիկա տարիներին Վրաստանի տարբեր շրջաններում շահագործման կհանձնվեն տասնյակ էլեկտրակայաններ: Բնականաբար, պլանավորված է արմատապես վերազինել բազմաթիվ էներգաբլոկներ: Կառուցվելու են նաև քամու էլեկտրակայաններ, որոնց ընդհանուր հզորությունը կազմելու է մի քանի հարյուր մեգավատտ: Դրանք հիմնականում կառուցվելու են Ջավախքում:
Հաջորդ տարի միայն ճանապարհաշինության վրա կծախսվի 700-800 միլիոն դոլար: Այդ գործընթացում կներգրավվեն տասնյակ հազարավոր մարդիկ:
Եթե ուշադրություն դարձնեն մեր գործունեությանը, ապա կտեսնեն, որ մենք ընդլայնել ենք դրա աշխարհագրությունը: Եթե նախկինում ողջ ուշադրությունը հատկացվում էր Թբիլիսիին, որը, Վրաստանի կարևոր կենտրոն լինելուց բացի, նաև Կովկասի մայրաքաղաքն է, ապա այժմ կառավարության «նշանակետում» է գտնվում Քութայիսին, որը վերածվելու է երկրորդ քաղաքական կենտրոնի: Այն կդառնա «խորհրդարանական մայրաքաղաք», և այնտեղ կտեղակայվեն բազմաթիվ կառավարական գերատեսչություններ: Դրա հետ մեկտեղ, պլանավորված է Բաթումում ստեղծել ֆինանսա-տնտեսական կենտրոն:
Վրաց ձեռնարկատերերը պետք է մեծ ուշադրություն հատկացնեն երկրի գյուղատնտեսական խնդիրներին: Վրաստանի ագրարային ոլորտի պոտենցիալն այնպիսին է, որ այն կարող է կրկնապատկվել ու եռապատկվել: Սակայն դա արվելու է աստիճանաբար: Ոչ մի թիզ անմշակ հող չպետք է մնա: Երկիրը պետք է կերակրի ինքն իրեն, մինչդեռ ներկայումս գյուղատնտեսությունը լավ օրեր չի ապրում:
Երբ Վրաստանում իշխանության եկավ նոր կառավարությունը, Վրաստան էր այցելում 125,000 զբոսաշրջիկ: Նախորդ տարի այդ ցուցանիշը հասել է 2 միլիոնի, իսկ այս տարի այն կկազմի 3 միլիոն: Նախատեսում ենք, որ 2015 թվականին Վրաստան կայցելի 5 միլիոն զբոսաշրջիկ»:
Հիշեցնենք, որ երեկ էլ Սաակաշվիլին հայտարարել էր, թե իրենց բարեփոխումներն ընդօրինակում են գրեթե բոլոր հետխորհրդային երկրները: