Մեր աղբյուրները հաղորդում են, որ Հայաստանի նախագահականում այս օրերին կրկին քննարկվում է Ալիկ Սարգսյանի պաշտոնանկության հարցը։ Խնդրի հասունացման համար հիմք է ծառայել Սերժ Սարգսյանի ապրիլի 20-ին ՀՀ իրավապահ համակարգի բարձրաստիճան ներկայացուցիչներին տրված հանձնարարականից հետո Մարտի 1-ի գործի շրջանակներում ոստիկանության բարձրաստիճան որոշ պաշտոնյաների դեմ քրեական գործեր հարուցելու հնարավորությունը։
Նախագահի նստավայրում կարծում են, որ վերջերս ՀՀ Ոստիկանության շուրջ 50 քննիչների ընդվզումը ՀՀ փոխոստիկանապետ Հովիկ Թամամյանի գործով իրենց գործընկերոջ` Հատկապես կարևորագույն գործերով քննության վարչության (ՀԿԳ) ավագ քննիչ, ոստիկանության մայոր Վահան Խանզադյանի կալանավորման առնչությամբ և Ոստիկանապետի՝ իրավիճակին չտիրապետելու հանգամանքը, կասկածներ է հարուցում, որ Մարտի 1-ի գործով բարձրաստիճան որևէ ոստիկանի կալանավորումը կարող է համակարգում այնպիսի լարում առաջացնել, որի տիրապետումն ընդհանրապես վեր կլինի Ալիկ Սարգսյանի ուժերից։
Ուստի այս պահին, նախագահականի մեր աղբյուրները հայտնում են, որ Սերժ Սարգսյանի խորհրդատուները կարծում են, որ Մարտի 1-ի գործով կալանավորումները պետք է սկսել առանց Ալիկ Սարգսյանի։