Վրացական GHN լրատվական գործակալության փոխանցմամբ, Վրաստանի նախագահ Միխեիլ Սաակաշվիլին ցանկանում է ամեն գնով հասնել ամերիկյան սպառազինության մատակարարմանը: Նա շարունակ պնդում է «պաշտպանական» զենքի ստացման անհրաժեշտության մասին` դա պատճառաբանելով ռուսական վտանգով:
Միայն նախորդ տարի Վրաստանն այդ նպատակով ԱՄՆ-ում իրականացրած լոբբիստական աշխատանքների վրա ծախսել է 1.5 միլիոն դոլար: Այն հատկացվել է վաշինգտոնյան 4 ազդեցիկ լոբբիստական կազմակերպություններին:
Հիշեցնենք, որ ոչ վաղ անցյալում Եվրոպայում ամերիկյան զորքերի հրամանատար, ծովակալ Ջեյմս Ստավրիդիսը հայտարարեց, որ ԱՄՆ-ը այլևս ծանր սպառազինություն չի հատկացնելու Վրաստանին: Դա առաջացրել էր սենատոր Ջոն Մաքքեյնի զայրույթը, ով հայտարարել էր, որ ԱՄՆ քաղաքական վերնախավից պահանջելու է վերանայել այդ որոշումը:
Ի դեպ, այս տարվա փետրվարին վրացական լրատվամիջոցները հայտնեցին, որ անցած տարի երկրի կառավարությունը պայմանագրեր է ստորագրել ամերիկյան միանգամից 4 լոբբինգային ընկերությունների հետ, որոնցից ամենախոշորը` The Gephard Group ընկերության հետ` 426,8 հազար դոլար արժողությամբ:
Նրանց հաղորդմամբ`լոբբինգի վրա ծախսվող գումարների չափով Վրաստանը գերազանցում է Հարավային Կովկասի և Կենտրոնական Ասիայի բոլոր երկրներին: