Ադրբեջանի 10 ընդդիմադիր կուսակցություններ հանդես են եկել հայտարարությամբ այն մասին, որ նոյեմբերի 7-ին այդ երկրում անցկացված խորհրդարանական ընտրություններն իշխանության կողմից ամբողջութամբ կեղծվել են, և պահանջել են նոր խորհրդարանական ընտրություններ անցկացնել: Այդ մասին հայտնում է BBC-ն: Ադրբեջանական ընդդիմության կողմից ընդունված համատեղ հայտարարության մեջ նոր կազմավորված խորհրդարանն անօրինական է անվանվել:
Ընդդիմության կարծիքով, նոյեմբերի 7-ի խորհրդարանական ընտրություններն իրականում ոչ թե ընտրություն, այլ նշանակման գործողություն են եղել, և նոր կազմավորված խորհրդարանը ոչ թե ընտրողների, այլ իշխող խավի կամքն է ներկայացնում: Ադրբեջանի գրեթե բոլոր ընդդիմադիր ուժերը ներկայացնող այդ 10 կուսակցությունները հայտարարության մեջ նշել են, որ չեն ճանաչում նոյեմբերի 7-ի ընտրությունների արդյունքները և նոր ընտրություններ են պահանջում: Տեղական դիտորդները հայտնում են, որ 1991 թվականին Ադրբեջանի անկախացումից հետո առաջին անգամ է, որ ընդդիմության ոչ մի ներկայացուցիչ չի անցել Միլլի Մեջլիս:
Ընդդիմությունը պնդում է, որ դա հնարավոր է դարձել իշխանության կողմից համընդհանուր կեղծարարության արդյունքում, և որ դրանով Ադրբեջանի իշխանությունը մարտահրավեր է նետում միջազգային հանրությանը: «Արդեն դատարաններ զանգվածային դիմումներ են սկսվել, և նրանց հիմնական հասցեն լինելու է Մարդու իրավունքների եվրոպական դատարանը»,- կայքին հայտնել է «Մուսավաթ» կուսակցության ղեկավար Իսա Ղամբարը:
Ինչպես հայտնի է, նոյեմբերի 7-ի խորհրդարանական ընտրությունների ընթացքը կասկածանքով էր ընդունվել նաև միջազգային հանրության կողմից: Վերջին օրերին մի շարք ազդեցիկ եվրոպական կառույցներ, ինչպես նաև ԱՄՆ պետդեպարտամենտը հայտարարել են, որ Ադրբեջանում անցկացված խորհրդարանական ընտրությունները չեն համապատասխանել միջազգային չափանիշներին:
Ադրբեջանի իշխանությունը, սակայն, համառում է, թե ընտրությունները լիովին դեմոկրատական են եղել: Ադրբեջանի նախագահի աշխատակազմի պաշտոնյա Ալի Հասանովը հայտարարել էր. «Ընտրությունը թափանցիկ ու արդարացի է եղել, և մենք զարմանում ու ցավում ենք այդ հայտարարությունների առթիվ»: Ընտրությունների արդյունքների կեղծման մասին խոսող որոշ թեկնածուներ իրենց մոտ եղած բողոքներն ու ապացույցները ներկայացրել են ԿԸՀ: Այդ ապացույցների մի մասը տեսանյութեր են: Ասվում է, որ ԿԸՀ-ն սկսել է հետազոտել ներկայացված փաստաթղթերը:
