Ամբողջ աշխարհում, հատկապես այն երկրներում, որտեղ հաստատված են ռեժիմային վարչակարգեր, միշտ մտահոգություն է արտահայտվել այն կապակցությամբ, որ IP հեռախոսակապի և տեսակապի ծառայություններ ապահովող Skype ընկերությունը, բացի այն, որ չի տրամադրում իր օգտատերերի տվյալները, այլև թույլ չի տալիս ապակոդավորել փոխանցվող տեղեկությունները:
Հիմա շատ մասնագետներ հայտնել են, որ Microsoft-ին այս ռեսուրսի վաճառքը կարող է հեշտացնել հատուկ ծառայությունների գործը: «Skype-ի ինտերնետ հեռախոսակապի կոդավորման միջոցներն այնքան լավ են ստեղծված, որ շատ երկրների հատուկ ծառայություններ մտածում էին դրա փակման կամ սահմանափակման մասին», ասել է Ռուսատանում և ԱՊՀ-ում G Data Software ընկերության ներկայացուցիչ Ռոման Կարասը:
«Հետաքրքիր է հիմա տեսնել, թե ինչպես են քննարկվելու Skype-ի արգելափակումները մեր (Ռուսաստանի – 1in.am) իշխանությունների կողմից: Ի տարբերություն դրա, Microsoft-ն ավելի հակված է հաամգործակցության` ունենալով մեծ բիզնես Ռուսաստանում և չցանկանալով բարդացնել իր գործերը», ասել է փորձագետ Ալեքսեյ Սվիրիդենկոն: Նա հիշեցրել է, որ Ռուսաստանն առաջին երկիրն է, որտեղ Microsoft-ն առաջին անգամ բացեց իր ելակետային կոդերը: Այս մասին նա ասել է RIA-Novosti գործակալությանը: