ՀՅԴ խմբակցության ղեկավար Վահան Հովհաննիսյանն այսօր առանձին ելույթով հանդես եկավ Ազգային ժողովում և հիմնավորեց, թե ինչու է ինքը դեմ էթիկայի հանձնաժողովի ստեղծմանը, որը պետք է վերահսկի պաշտոնյաների գույքն ու եկամուտները:
Վահան Հովհաննիսյանը նշեց, որ այն թեև դիտարկվելու է որպես հակակոռուպցիոն մարմին, սակայն դրական արդյունքների չի կարող հանգեցնել, քանի որ անկախ չէ: Օրինակ` անդամներին նշանակելու է ԱԺ նախագահը, իսկ ինչպես հայտնի է, նրանց, ում ընտրում է ԱԺ մեծամասնությունը, գլխավոր դատախազը, ՄԻՊ-ը` բոլորը խորհրդարանական մեծամասնության ներկայացուցիչներ են, հետևաբար նրանք ոչ թե երևույթն են արմատախիլ անելու, այլ քաղաքական պատվեր են իրականացնելու, ապա հիշեցրեց ԱԺ պատգամավոր Խաչատուր Սուքիասյանի օրինակը:
«Արդյո՞ք չկային պատգամավորներ, որոնք ավելի խիստ պատժի էին արժանի, բայց ընտրվեց այս մեկը, որովհետև հրահանգված էր: Հետևաբար չենք հավատում այս կառույցի անկախությանը: Դուք` պատգամավորներդ, անձեռնմխելի եք չէ՞, ասում են` բոլոր կենդանիները հավասար են, բայց մենք այդքան էլ հավասար չենք, կան մի քիչ ավելի շատ, մի քիչ ավելի քիչ անձեռնմխելիներ, ուստի ՀՅԴ-ն կողմ չի քվեարկելու էթիկայի հանձնաժողովի ստեղծմանը»,- նշեց Վահան Հովհաննիսյանը:
