Այսօր ԱԺ-ում խոսվում էր, թե էթիկայի հանձնաժողովի ստեղծումը նպատակ ունի ԱԺ մի շարք պատգամավորների դուրս թողնել խորհրդարանից, ուստի լրագրողներն արդարադատության նախարարից հետաքրքրվեցին, թե որքանո՞վ են այդ կասկածները հիմնավոր:
Նախարարի խոսքերով, թեև Սահմանադրությունն արգելում է ԱԺ պատգամավորներին զբաղվել ձեռնարկատիրական գործունեությամբ, բայց այդ գործունեությունը որոշ դեպքերում նկատելի է և իրականացվում է. «Այս հանձնաժողովը մանրադիտակով դիտարկելու է, թե տարվա սկզբին պաշտոնյաներն ինչ գույք են ունեցել, տարվա ընթացքում ինչ եկամուտներ են ստացել, և թե տարվա վերջում ինչ արդյունքներ են արձանագրվել, իսկ եթե անհամաչափություն է տեղի ունեցել, այսինքն արձանագրվել է x գույք և y եկամուտ, բայց տարվա վերջում արդյունքները մի քանի անգամ մեծ են x+y հանրագումարից, ապա անձն առնվազն պետք է հրապարակային պատասխան տա։ Ավելին, նա մինչև ձեռնարկատիրական գործունեության անցնելը պետք է այդ մասին զեկուցեր վարչապետին, որից հետո կորոշվեր, թե ինչ կոնտեքստով է թույլատրվում զբաղվել տվյալ ձեռնարկատիրական գործունեությամբ. կամ առհասարակ զբաղվե՞լ, թե չզբաղվե՞լ»: