«Թուրքիան ցանկանում է, որպեսզի հայ – ադրբեջանական հակամարտությունը կարգավորվի խաղաղ ճանապարհով»,- Ստրասբուրգում կայացած մամուլի ասուլիսում հայտարարել է Թուրքիայի արտգործնախարար Ահմեդ Դավութօղլուն:
Թուրքիան նախօրեին պաշտոնապես ստաձնել է Եվրախորհրդի Նախարարների կոմիտեի նախագահությունը: Լրագրողների հարցին, թե կոմիտեում նախագահելու ժամանակահատվածում Թուրքիան ի՞նչ ներդրում կարող է ունենալ «սառեցված» հակամարտությունների, այդ թվում` Ղարաբաղյան հակամարտության կարգավորման գործում, Դավութօղլուն պատասխանել է.- «Մենք, իհարկե, ուշադրության կենտրոնում ենք պահելու «սառեցված» հակամարտությունները»:
Անդրադառնալով Եվրամիությանը Թուրքիայի անդամակցության հեռանկարին և նախօրեին Եվրահանձնաժողովի հրապարակած զեկույցին, ըստ որի` Թուրքիան դեռ պատրաստ չէ Եվրամիության անդամ դառնալ, Դավութօղլուն ասել է, թե իրենք բազմաթիվ բնագավառներում հասել են զգալի արդյունքների: «Մեր խնդիրն է` երկրում ապահովել ժողովրդավարության ամենաբարձր մակարդակ, և պատրաստ ենք դիմակայել բոլոր մարտահրավերներին», – հայտարարել է Թուրքիայի ԱԳ նախարարը:
