Այսօր Հայաստանի պետական ճարտարագիտական համալսարանում տեղի ունեցավ Microsoft-ի ինովացիոն կենտրոնի բացման պաշտոնական արարողությունը:
Միջոցառմանը ներկա ԿԳ նախարար Արմեն Աշոտյանից փորձեցինք ճշտել, թե նման կենտրոնների գործունեությունը մեր երկրում, գոնե առաջիկայում, ինչքանո՞վ կարող է արդյունավետ լինել, և ընդհանրապես, որպես այս ոլորտը գերակա ուղղություն հռչակած պետություն, կարո՞ղ ենք մրցունակ լինել գոնե տարածաշրջանում, եթե մենք այսօր, ըստ էության, չենք լուծել նույնիսկ կապի տարրական խնդիրը, երբ կապ տրամադրող գրեթե բոլոր ընկերությունների նկատմամբ քաղաքացիների անվստահությունն ու դժգոհությունն ավելանում է օր օրի:
«Ես երբե՛ք խնդիր չեմ ունեցել, երբե՛ք,- հակադարձեց Աշոտյանն ու ավելացրեց,- և՛ Orange-ից եմ օգտվում, և՛ VivaCell-ից, և՛ ArmenTel-ից. 3-ն էլ ունեմ: Որն այդ պահին լավ չի աշխատում՝ մյուսից եմ օգտվում»,- ժպտալով ասաց նախարարը:
