Մալաթիա-Սեբաստիա վարչական շրջանների ընդհանուր իրավասության դատարանում Կարեն Ֆարխոյանի նախագահությամբ ավարտվել է Չինար Սոկրատի Խաչատրյանի գործի դատավարությունը:
Ըստ մեղադրանքի՝ 53-ամյա Չինարը 2012 թվականի սեպտեմբերից մինչև դեկտեմբեր Երևան քաղաքի Բաբաջանյան փողոցի շենքերից մեկում իր կողմից վարձակալած բնակարանը պարբերաբար, ընդհանուրը՝ 10-12 անգամ, տրամադրել է մարմնավաճառ Գայանեին՝ որպես պոռնկությամբ զբաղվելու վայր: Բնակարանը տրամադրելու դիմաց Չինարը Գայանեից յուրաքանչյուր անգամ ստացել է 1-2 հազար դրամ:
Մինչև դատաքննությունը սկսվելը Չինար Խաչատրյանը հայտարարել է, որ իրեն մեղավոր է ճանաչում ՀՀ քրեական օրենսգրքի 262 հոդվածի 1-ին մասով՝ պոռնկությամբ զբաղվելուն նպաստելու համար: Ամբաստանյալը միջնորդել է իր գործը քննել արագացված ընթացակարգով:
Ընդհանուր իրավասության դատարանը Չինար Խաչատրյանին մեղավոր է ճանաչել ու դատապարտել 350 հազար դրամ տուգանքի:
Դատավճիռը չի բողոքարկվել, մտել է ուժի մեջ: Ավելին: Չինար Խաչատրյանն արդեն մուծել է սահմանված տուգանքը, և անդորրագիրը դրվել է քրեական գործի մեջ:
