Պաշտպանության նախարարության Մոնթե Մելքոնյանի անվան ռազմական վարժարանի շրջանավարտների համար հնչում է վերջին զանգը: Ավարտական միջոցառմանը շրջանավարտները ի ցույց են դնում մարտական պատրաստվածության ողջ հմայքը:
Մարտական պատրաստվածությունը շրջանավարտների ապրելակերպն է, վստահ են ցուցադրում, մինչդեռ ավարտական վալսն անհանգստությամբ են պարում՝ հանկարծ պարային սխալ քայլ չանեն. ապագա զինվորականներ են, սխալվելն իրենց համար չէ:
Ռազմական վարժարանի ավարտական միջոցառման ամենակարևոր հատվածն ուսման և կարգապահության մեջ աչքի ընկած լավագույն ուսանողի անունը հայտարարելն է: Լավագույնը պատիվ ունի կրելու Մոնթե Մելքոնյանի անձնական ինքնաձիգը. զոհվելիս այն եղել է ազգային հերոսի մոտ:
Վարժարանի լավագույն սանը որոշել է՝ մեկնելու է Ռուսաստան՝ բարձրագույն կրթություն ստանալու, բայց՝ վերադառնալու պայմանով. հայրենիքի սահմանները հսկելու պարտք ունի:
Շրջանավարտները հպարտ են, ծնողները՝ հուզված. հայրենիքի արժանի պաշտպաններ են դաստիարակել:
Ռազմական վարժարանի 69 շրջանավարտների 94 տոկոսը զինվորական է դառնալու, մեծ մասը կրթությունը շարունակելու է արտասահմանում:
Ռազմական վարժարանի նախկին շրջանավարտներն արդեն ապացուցել են՝ երկրի պաշտպանության համար չեն խնայի անգամ սեփական կյանքը:
Վարժարանի շրջանավարտները կյանքի սեփական ուղին արդեն ընտրել են. ապրելու են զինվորականի կյանքով: Ունեն մեկ ընդհանուր երազանք՝ հայրենիքի սահմանները պետք է խաղաղ պահել:
