Կուալա Լամպուրում Մալազիայի պաշտպանության նախարար Ահմադ Զահիդ Համիդիի հետ տեղի ունեցած հանդիպումից հետո ԱՄՆ պաշտպանության նախարար Ռոբերտ Գեյթսը հայտարարել է, որ ԱՄՆ-ը պատրաստ է 2011-ից հետո երկարաձգել զորքերի տեղակայման ժամկետը Իրաքում, եթե Բաղդադն այդ մասին խնդրի. այս մասին, հաղորդել են միջազգային գործակալությունները: «Մենք կարող ենք մնալ:
Մենք պատրաստ ենք այդ բանավեճին, երբ էլ նրանք ցանկանան: Այդ նախաձեռնությունը պետք է գա իրաքցիներից: Մենք բաց ենք այն քննարկելու համար: Հույս ունենք, որ իրաքցիները շարժվում են ամեն ինչ ընդգրկող կառավարություն կազմելու ուղղությամբ, որը կներկայացնի իրաքյան հասարակության բոլոր հիմնական տարրերն ու բոլոր կրոնները»,- ասել է նա:
Գեյթսը իրաքյան խմբերին կոչ է արել հաշտվել և վերջ դնել ութամյա քաղաքական կռիվներին: Իրաքում ԱՄՆ ռազմական ներկայությունը երկարաձգելու ցանկացած խնդրանք պետք է ստացվի գործող իրաքյան կառավարությունից: Դա կփոխեր ներկայումս գործող համաձայնությունը, որով ամերիկյան զորքերը պետք է երկիրը լքեն մինչև 2011 թ. վերջը:
Գեյթսը նաև ասել է, որ ինքն անմիջականորեն չի խոսել քաղաքական առաջնորդներից ոչ մեկի հետ, բայց դրանով զբաղվել են ամերիկյան այլ չինովնիկներ, այդ թվում`փոխնախագահ Ջո Բայդենը: Գեյթսը կանխատեսել է, որ իրաքյան նոր կառավարությունից որոշ ժամանակ կպահանջվի` նախքան ԱՄՆ-ին զորքերի ներկայությունը երկարաձգելու մասին խնդրելը: