Վրացական News Georgia կայքի փոխանցմամբ, Վրաստանի նախագահ Միխեիլ Սաակաշվիլին հանձնարարականներ է տվել համապատասխան գերատեսչություններին` զբոսաշրջիկներին պատշաճ կերպ դիմավորելու համար: Այս մասին հայտարարել է նախագահի մամլո խոսնակ Մանանա Մանջգալաձեն.
«Այս տարվա հունվարին նախագահ Սաակաշվիլին հայտարարեց, որ կառավարության առաջնահերթ խնդիրներից մեկը պետք է լինի զբոսաշրջության զարգացումը: Մենք ակնկալում ենք, որ այս տարի Վրաստան կայցելեն բավական շատ զբոսաշրջիկներ: Դրա համար համապատասխան հիմնավորումներ ունենք: Վիճակագրական տվյալների համաձայն, այս տարի Վրաստան այցելել է 674,409 մարդ, ինչը նախորդ տարվա համեմատ 43 տոկոսով ավելի է:
Վրաստանը պատրաստ է զբոսաշրջային նոր սեզոնին: Դա չի վերաբերում միայն ծովափնյա շրջաններին: Խոսքը ողջ երկրի, այդ թվում՝ նաև լեռնային առողջարանների մասին է: Այս ոլորտում մեր ունեցած հաջողությունները նոր ներդրումների ու աշխատատեղերի գրավականն են»։
Նշվում է, որ Համաշխարհային տնտեսական ֆորումի Զբոսաշրջության ու ճանապարհորդության մրցունակության ինդեքսի (The Travel & Tourism Competitiveness Index) 2011 թվականի վարկանիշային աղյուսակում 139 երկրների թվում Վրաստանը 3.98 բալով զբաղեցրել է 73-րդ տեղը:
Հիշեցնենք, որ վրացական կողմի կանխատեսմամբ, այս տարի եռապատկվելու է Վրաստան այցելող հայ զբոսաշրջիկների թիվը, ինչի համար էլ հունիսի 15-ից մինչև սեպտեմբերի 30-ը ամեն օր գործելու է Երևան-Բաթում-Երևան արագընթաց գնացքը: