The Knight Frank ընկերությունը հրապարակել է աշխարհի լավագույն քաղաքների վարկանիշային աղյուսակը` հաշվի առնելով մի քանի չափանիշներ, այդ թվում` տնտեսական ակտիվությունը, գիտելիքն ու ազդեցությունը, կյանքի որակը, քաղաքական ազդեցությունը և այլն:
Ցուցակի առաջին հորիզոնականում Նյու Յորքն է, որն անցյալ տարի ևս գլխավորում էր այն: Հաջորդում են Լոնդոնը, Փարիզը և Տոկիոն: Անցյալ տարվա համեմատ մեկ նիշով վեր է բարձրացել Բելգիայի մայրաքաղաք Բրյուսելը և այժմ զբաղեցնում է 5-րդ հորիզոնականը` շրջանցելով Լոս Անջելեսին:
Ամենամեծ նահանջը` երեք տեղով, արձանագրել են Հոնգ Կոնգն ու Կահիրեն, որոնք այս ցուցակում զբաղեցնում են համապատասխանաբար 17-րդ և 31-րդ տեղերը:
Տնտեսական ակտիվությամբ առաջին դիրքերում են կրկին Նյու Յորքը, Լոնդոնը, Տոկիոն, Փարիզը և նրանց միացած Շանհայը:
Կյանքի որակով հավասարը չունեն Փարիզը, Բեռլինը, Տորոնտոն, Ֆրանկֆուրտը և Լոնդոնը:
Քաղաքական ազդեցությամբ առաջինը Վաշինգտոնն է, որին հետևում են Նյու Յորքը, Բրյուսելը, Պեկինը և Լոնդոնը: Հետաքրքիր է, որ այս ցուցանիշով լավագույն տասնյակում է նաև Կահիրեն, որը վերջին հեղափոխությունից հետո ավելի մեծ կշիռ է ձեռք բերում տարածաշրջանում:
«Ավելի խելացի» են Նյու Յորքը, Լոնդոնը, Տոկիոն, Փարիզը և Հոնգ Կոնգը:
The Knight Frank-ը հրապարակել է նաև վերջին տասը տարվա առաջատարներին: Այս վարկանիշային ցուցակում առաջին տեղում կրկին Նյու Յորքն է, որին հետևում է Մեծ Բրիտանիայի մայրաքաղաք Լոնդոնը, ապա հարավարևելյան երեք քաղաքները` Շանհայը, Պեկինը և Հոնգ Կոնգը: