Ադրբեջանական Vesti.az կայքի փոխանցմամբ, Վրաստանի նախկին նախագահ էդուարդ Շևարդնաձեն ադրբեջանական ANS հեռուստաալիքին տված հարցազրույցի ժամանակ անդրադարձել է Հարավային Կովկասի հակամարտություններին.
«Անդրկովկասում կային երեք լուրջ ղեկավարներ, որոնք ունակ էին իրենց երկրում վերահսկելու իրավիճակը՝ ես, Հեյդար Ալիևը և Կարեն Դեմիրճյանը: Մենք երեքով սերտ համագործակցում էինք: Եվ եթե մենք` երեքս, լինեինք երկրների ղեկավարներ, ապա ոչ մի հակասություն էլ չէր առաջանա:
Սակայն դժբախտաբար Դեմիրճյանն ահաբեկիչների կողմից սպանվեց Հայաստանի խորհրդարանում: Եթե Դեմիրճյանը կենդանի լիներ, իսկ Հեյդար Ալիևն էլ մեզ հետ լիներ, ղարաբաղյան և աբխազական հարցերը վաղուց գտած կլինեին իրենց լուծումը: Հենց այդպես»:
Շևարդնաձեն նաև պատմել է Հեյդար Ալիևի և նրա նախորդի` Աբուլֆազ էլչիբեյի միջև տեղի ունեցած վեճի մասին. «Մի անգամ ես մեկնում էի Տաշքենդ, և ճանապարհին կանգ առա Բաքվում: Հենց օդանավակայանում էլ ականատես եղա Հեյդար Ալիևի և Աբուլֆազ էլչիբեյի վեճին, որը վերաբերում էր Ղարաբաղին:
էլչիբեյը պնդում էր Հայաստանի դեմ անհետաձգելի պատերազմի մասին, իսկ փորձառու Ալիևը նրան հարցնում էր. «Իսկ դու բանակ ունե՞ս»: էլչիբեյն էլ նրան պատասխանում էր, որ դա կլինի: Ալիևն էլ նրան հակադարձեց, թե զենք և տեխնիկա չկա, բացի այդ, պատերազմը զորավարժություն չէ, այն շատ լուրջ գործ է` մանավանդ, որ խոսքը երկու ժողովուրդների մասին է:
Ես երկար ժամանակ գտնվում էի այդ վիճաբանության ազդեցության տակ, և լավ էր, որ էլչիբեյի մտադրությունը կյանքի չկոչվեց»:
Հիշեցնենք, որ 1992 թվականին Ադրբեջանի նախագահի պաշտոնում Այազ Մութալիբովին փոխարինած Աբուլֆազ էլչիբեյն իր երդման արարողության ժամանակ հայտարարեց. «Արդեն 100 օր անց ես թեյ կխմեմ հայերից մաքրված Ստեփանակերտում, ապա ոտքերս կլվանամ Սևանա լճում»: Ընդ որում, հոխորտացող էլչիբեյը խոստացել էր ինքնասպանություն գործել, եթե չիրագործի իր այդ խոստումը:
Սակայն երդմնազանց ադրբեջանցին իր խոստման տերը չեղավ և 2000 թվականին օգոստոսի 22-ին իր մահկանացուն կնքեց Անկարայի հոսպիտալում, ուր բուժվում էր քաղցկեղից: