Business Грузия-ի փոխանցմամբ, Վրաստանը վերածվել է ավտոմեքենաների առևտրի տարածաշրջանային կենտրոնի: 2011 թվականի առաջին եռամսյակում Վրաստան է ներկրվել 82 միլիոն դոլարի ավտոմեքենա և արտահանվել 95 միլիոն դոլարի ավտոմեքենա: Վրաստանի միջոցով ավտոմեքենաներն այստեղից ուղարկվում են Ադրբեջան, Հայաստան ու Ղազախստան:
Այն, որ այս բիզնեսը շահութաբեր է, վկայում է ներկրման ու արտահանման ոլորտում եղած 13 միլիոն դոլարի տարբերությունը:
Արտահանողների խոսքերով, Վրաստանում ավտոմեքենաների գները շատ ավելի ցածր են, քան Ադրբեջանում, Ղազախստանում ու Հայաստանում:
Օրինակ` եթե BMW տիպի ավտոմեքենայի միջին գինը Վրաստանում կազմում է 5000 դոլար, ապա հարևան Ադրբեջանում այն գրեթե կրկնակի թանկ է:
Ադրբեջանի քաղաքացիները հայտարարում են, որ Վրաստանում մաքսային ծառայությունը շատ ավելի էժան է, քան Ադրբեջանում: Ավտոմեքենայի մաքսազերծումը Վրաստանում կազմում է ավտոմեքենայի ինքնարժեքի մոտ 5 տոկոսը, մինչդեռ Ադրբեջանում դա կազմում է 25 տոկոս:
Հայաստանի, Ադրբեջանի ու Ղազախստանի քաղաքացիները բավականին գոհ են Վրաստանում մատուցվող ծառայություններից. այստեղ ավտոմեքենայի գրանցումն ու համարների ստացումը հնարավոր է իրականացնել 15-20 րոպեում, և դա արժե ընդամենը 40 դոլար:
Վրաստանում ամենաշատ վաճառվող ավտոմեքենաներն են Mercedes-ը և BMW-ն:
Հիշեցնենք, որ շուրջ մեկ ամիս առաջ Վրաստանի վարչապետ Նիկա Գիլաուրին հայտարարեց, որ Վրաստանից արտահանվող ապրանքների թվում ավտոմեքենաները զբաղեցնում են առաջին տեղը:
Բացի այդ, Թբիլիսիի մերձակայքում` Ռուսթավի քաղաքում, գործում է Անդրկովկասի խոշորագույն ավտոշուկան՝ նախատեսված է 5000 ավտոմեքենաների համար:
