Ռուսաստանցի քաղաքագետ Անդրեյ Արեշևի կարծիքով՝ Ռուսաստանը որևէ պատճառ չունի բացասական վերաբերվելու Աֆղանստանում միջազգային անվտանգության ապահովման ուժերի կազմում գործող հայկական ստորաբաժանման թվակազմը մոտ երեք անգամ ավելացնելու և առաքելությունը երկարաձգելու վերաբերյալ Հայաստանի խորհրդարանի որոշմանը։
«Նախևառաջ՝ Հայաստանն անկախ և ինքնուրույն պետություն է և իր արտաքին քաղաքականությունն իրականացնում է՝ ելնելով ազգային շահերից: Այս առումով Ռուսաստանի վերաբերմունքը կարող է լինել միայն դրական, քանզի ՌԴ-ն ինքը, որպես ռազմական տրանզիտ, ակտիվորեն մասնակցում է ՆԱՏՕ-ի առաքելությանը Աֆղանստանում»,- «Առաջին լրատվականի» հետ զրույցում ասաց Արեշևը:
Արեշևը նկատեց, որ թեև Ռուսաստանը Աֆղանստանի ներքին գործերին չի միջամտում և որևէ զինվորական մասնակցություն չունի այնտեղ, սակայն այսօր Ռուսաստանի և Արևմտյան ալյանսի միջև աֆղանական խնդրի շուրջ որևէ հակասություն չկա. «Պարզ է, որ այդ համատեքստում Ռուսաստանը որևէ պատճառ չունի բացասական վերաբերվելու Աֆղանստանում հայկական ռազմական ուժերի ներկայության ժամկետի երկարաձգման և թվաքանակի ավելացման մասին որոշմանը»:
