1988 թվականի դեկտեմբերի 7-ին Հայաստանի հյուսիսը գետնին հավասարվեց մոտ 7 մագնիտուդ ուժգնությամբ երկրաշարժի հետևանքով։ 25 հազար մարդ զոհվեց, հազարավոր մարդիկ վիրավորվեցին, և հարյուր հազարավորներն անօթևան դարձան այն ժամանակվա դեռևս խորհրդային հանրապետությունում։
Խորհրդային Միության փլուզումը զգալիորեն խոչընդոտեց տուժած քաղաքների վերակառուցմանը, ներառյալ Գյումրիի՝ Հայաստանի մեծությամբ երկրորդ քաղաքի։ Շատ ընտանիքներ դեռևս սպասում են օգնության, սակայն ենթակա չեն կառավարության կողմից բնակարանային ապահովման, եթե չեն համարվում երկրաշարժի անմիջական զոհ։ Այս մասին The Washington Post-ում գրում է Քլոե Քոլեմանը՝ ներկայացնելով լուսանկարչուհի Յուլյա Գրիգորյանցի կողմից տրամադրված ֆոտոշարքը։ Լուսանկարչուհին սխալմամբ հայտնվել է Գյումրիի լքված շենքերից մեկում և հանդիպել մի քանի ընտանիքների՝ կիսելով իր տեսածը պարբերականի հետ։
«Խորhրդային ժամանակներում ընդհանուր սենյակներով այդ վիթխարի երկվորյակ շենքերից յուրաքանչյուրում ապաստանում էր 60 ընտանիք։ Այսօր այնտեղ բնակվող ընդամենը 4 ընտանիք կա…4 ընտանիքներ և սերունդներ, որոնք ծնվել ու մեծացել են այստեղ՝ փլուզվող պատերի մեջ ու միջանցքներում․ ապրելով այս դատարկության մեջ…ապրելով իրենց անհույս, կալանված կյանքը»,- նշել է լուսանկարչուհին։
«Մոտ մեկ տարի առաջ՝ անցած հունիսին, վարում էի Գյումրիով և սխալ շրջադարձի պատճառով ավելի շատ ուշադրություն էի դարձնում ճանապարհին՝ ճիշտ ուղու որոնումներով, երբ նկատեցի այդ երկու հսկա երկվորյակ շենքերը՝ մեկը մյուսի առջև։ Առաջին հայացքից ինձ թվաց, թե դրանք բնակեցված չեն. դա ակնհայտ էր բացակայող լուսամուտներից, տանիքից և շենքերի ընդհանուր վիճակից։ Բայց այն, ինչ գրավեց ուշադրությունս՝ երկրորդ հարկից կախված լվացքն էր»,- ասել է լուսանկարչուհին։
Մի քանի օր նա այցելել է այդ շենքեր, հանդիպել ընտանիքների հետ. «Մոտ մեկ տարի ես շարունակում էի մտածել նրանց մասին, բայց քաղաքից բացակա լինելու պատճառով հնարավորություն չունեի նրանց կրկին այցելելու։ Մարտին 9 օր անցկացրի Գյումրիում՝ աշխատելով այս պատմության վրա և ամեն օր հանդիպելով ընտանիքների հետ: Այդ բոլոր օրերը անցկացրեցի նրանց հետ այդ շենքերում»,- ասել է նա։
5 երեխաների մայր, 30-ամյա ուժասպառ Լուսինեն, որի ամուսինը նկարահանումից 10 օր առաջ էր ինքնասպան եղել
38-ամյա Կնյազը ճաշ է պատրաստում 10-ամյա դստեր՝ Աստղիկի համար
Լուսինեի երեխաներն են՝ 7-ամյա Լևոնը, 11-ամյա Կարինեն և 9-ամյա Սյուզաննան
Բնակչուհի Սոսեի որդին է՝ 10-ամյա Ալեքսը
Ամուսինը լքել է Սոսեին, մինչ այդ նա ծեծի է ենթարկել կնոջը՝ ստիպելով դադարեցնել երկրորդ հղիությունը, սակայն Սոսեն համառել է և լույս աշխարհ բերել դուստր
«Խաղահրապարակ»՝ երկու շենքերի արանքում
Խաղալիքների թանգարանը շուտով կարող է ի չիք դառնալ, քանի որ վերևի հարկերի բնակիչները վերջին շրջանում հեռացել են՝ առաստաղի ու պատերի փլուզումների պատճառով
Լևոնն ինքնասպան եղած հոր նկարն է նայում
Սյուզաննան հոգ է տանում կրտսեր քրոջ՝ Նարեի մասին
57-ամյա Կարինեն չորացած տերևներն է վառում
Խորhրդային տարիներին այս վիթխարի երկվորյակ շենքերից յուրաքանչյուրում ապաստանում էր 60 ընտանիք, այսօր այնտեղ բնակվող ընդամենը 4 ընտանիք կա